2017-12-04 15:56:00
«Hayeli »-ն գրում է.Կառավարությունում՝ վարչապետ Կարեն Կարապետյանի գլխավորությամբ տեղի է ունեցել Կոռուպցիայի դեմ պայքարի խորհրդի նիստ՝ քաղաքացիական հասարակության ներկայացուցիչների մասնակցությամբ:
Խորհրդին է ներկայացվել «Հակակոռուպցիոն մոնիթորինգի պլատֆորմ» կայքը, որտեղ տեղադրվել է Հակակոռուպցիոն ռազմավարությունը և դրա իրականացման 2015-2018 թթ. հակակոռուպցիոն միջոցառումների ծրագիրը: Զեկուցվել է, որ կայքը հնարավորություն կտա հանրությանը վերահսկողություն իրականացնել հակակոռուպցիոն միջոցառումների նկատմամբ, հղել առցանց հարցումներ գերակա ոլորտների գործողություններն իրականացնող մարմինների, ինչպես նաև հակակոռուպցիոն ծրագրերն իրականացնող մյուս գերատեսչությունների պատասխանատուների նկատմամբ: Այժմ ընթացքի մեջ են տեխնիկական աշխատանքները. ակնկալվում է, որ կայքը կսկսի գործել մինչ տարեվերջ:
Օրակարգի հաջորդ հարցով ներկայացվել են «Ազդարարման համակարգի մասին» ՀՀ օրենքից բխող ենթաօրենսդրական ակտերի, համակարգի կայացմանն ուղղված պրակտիկ մեխանիզմները: Զեկուցվել է, որ մշակվել են «Ազդարարման միասնական էլեկտրոնային հարթակ»-ի տեխնիկական նկարագիրն ու վարման կարգը, ինչպես նաև ներքին, արտաքին ազդարարման դեպքում համապատասխան թվային փաստաթղթերի ձևերը և ազդարարին տրվող պաշտպանության միջոցների իրականացման ընթացակարգը: «Ազդարարման միասնական էլեկտրոնային հարթակ»-ի միջոցով ցանկացած ֆիզիկական և իրավաբանական անձ հնարավորություն է ունենալու անանուն ներկայացնել հաղորդագրություն՝ կոռուպցիոն դեպքի հետ կապված: Ընդ որում, հնարավորություն է տրվելու հաղորդում ներկայացնել և անանուն, և հրապարակային տեսքով: Հստակ ներկայացվել են այն երաշխիքները, որոնք ապահովելու են անանունությունը, այն տեխնիկական լուծումները, որոնց միջոցով ազդարարը մուտք գործելով համակարգ՝ ներկայացնելու է համապատասխան հաղորդագրությունը: Ընդգծվել է՝ որևէ մարմին չի կարողանալու պարզել ազդարարի ինքնությունը և այն, թե որ համակարգչից է հաղորդագրությունն ուղարկվել: Քաղհասարակության հետ ակտիվ քննարկումների արդյունքում մշակվել են նաև հաղորդագրությանը ներկայացվող պահանջները: Տեղեկացվել է, որ հրապարակվելու է հստակ վիճակագրություն, թե որքան հաղորդում է ստացվել, քանիսի հիման վրա է հարուցվել քրեական գործ:
Ազդարարման համակարգն ըստ էության գործ տվողների ինստիտուտի խթանում է ենթադրում, որը ներմուծվել է՝ իբր թե կոռուպցիայի դեմ պայքարն ավելի արդյունավետ դարձնելու նպատակով: Նախ՝ տեսականորեն դժվար է հավատալ, որ հատուկ ծառայությունները չեն տիրապետելու այս կամ այն պաշտոնյայի դեմ նոր համակարգով բողոքներ ներկայացրած անձանց տվյալներին կամ, որ առավել վտանգավոր է, նման անձինք չեն հետապնդվելու և հալածվելու: Ի վերջո, այդ նույն ազդարարման համակարգի առավել պարզ մեխանիզմը պետական գերատեսչությունների «Թեժ գիծ» ծառայություններն են, որոնք գործում են վաղուց:
Թեժ գծի ահազանգը կարող է անանուն լինել, բայց, քանի որ զանգողի համարը ֆիքսվում է, հետևաբար ցանկության դեպքում միշտ կարելի է պարզել, թե ով է եղել բողոքողը: Ավելին՝ բոլոր տեսակի «Թեժ գծերի» արդյունքների վերլուծությունը ցույց է տալիս, որ ուսումնասիրության փուլում բողոքները հերքվում են և, որպես կանոն, որևէ հետևանք չեն ունենում, չնայած որ կա համապատասխան ընթացակարգ, որով ուսումնասիրվում և ընթացք են ստանում բոլոր, այդ թվում նաև անանուն ահազանգերը: Բայց կյանքը ցույց է տալիս, որ այն պաշտոնյաները, ում դեմ բողոքել են, 100-98-ի դեպքում կարողանում են վերադասների կամ էլ իրավապահ մարմինների հետ իրենց հարցերը լուծել:
Ով չգիտի, որ «Թեժ գծի» բողոքները «արդյունք» են ապահովում միայն այն ժամանակ, երբ կոնկրետ դեպքի և բողոքի թիրախում հայտնված պաշտոնյայի հետ կապված կա քաղաքական որոշում: Նման դեպքերում «Թեժ գծի» բողոքը կարող է անգամ քար ծակել:
Շարունակությունը՝ սկզբնաղբյուր կայքում:
Այս նյութը դիտել են - 10662 անգամ