2016-01-30 09:19:00
Երբ հրապարակավ հարց ենք բարձրացնում, թե ինչու՞ նավթի գների նվազման պարագայում բենզինը Հայաստանում ամենաթանկն է նախկին ԽՍՀՄ երկրների համեմատ, պատասխանում են, որ նավթի բաղադրիչը բենզինի արժեքի մեջ 7 տոկոս է: Մոռանանք մի պահ նավթի գները: Հայաստանը Եվրասիական տնտեսական միության անդամ է և բենզինի նման ապրանքն առանց մաքսի կարող է շրջանառվել միության տարածքում:
armweeklynews-ի փոխանցմամբ, հունվարի 27-ի դրությամբ Ռուսաստանի Սանկտ Պետերբուրգի նավթամթերքների բորսայում, որը բենզինի հիմնական հարթակն է, 1 տոննա բենզինը վաճառվում է տոննան 390-ից 391 դոլարով:
Իհարկե, մինչ այդ բենզինը հասնի Հայաստան, կլինեն տրանսպորտային ծախսեր: Առկա է նաև երկրում բենզինի մեծածախ և մանրածախ ծավալի վրա հարկային բեռը: Բայց ոչ մի սպառող չի հավատա, որ կարելի է բենզինը գնել Սանկտ Պետերբուրգում տոննան 390 դոլարով և մանրածախ վաճառել սպառողին տոննան 800 դոլարով: Չի կարող բենզինի արժեքը գնում-ներմուծում-վաճառք սխեմայով աճի երկու անգամ:
Նման բան չի կարող լինել անմաքս տնտեսական միության տարածքում: