Հայաստանը Ռուսաստանի հետ գազային համաձայնագիրը չեղյալ անելու շեմին է
Այս շաբաթ Հայաստանի վարչապետ Հովիկ Աբրահամյանը կոչ է արել Ռուսաստանին իջեցնել գազի գինը: Ընդ որում, խոսքը ոչ միայն սահմանին գնի, այլ նաեւ Գազպրոմ Արմենիայի սակագների մասին է:
Ռուսաստանը չի պատասխանում Հայաստանի արդեն երկրորդ կոչին: Պաշտոնյաներն ասում են, որ բանակցությունները շարունակվում են, սակայն ոչ ոք չի ասում, թե երբ կավարտվեն դրանք եւ ինչ արդյունք կունենան:
Մինչդեռ, վարչապետի հայտարարությունից ընդամենը մեկ օր առաջ էկոնոմիկայի նախարար Կարեն Ճշմարիտյանն ասել է, որ Հայաստանը չի պայքարում եւ մտադիր չէ պայքարել մենաշնորհների դեմ: Մինչ այդ էլ էներգետիկայի նախարար Երվանդ Զախարյանն էր հայտարարել, որ Իրանը Հայաստանին ավելի էժան գազ չի առաջարկում, եւ Իրանի հետ բանակցություններ չեն տարվում: Երեկ փոխվարչապետ Վաչե Գաբրիելյանն ասել է, որ Իրանի հետ բանակցություններ տարվում են, բայց չի նշել, թե ինչի մասին:
Հայաստանը կանգնած է էներգետիկ քաղաքականության վերանայման շեմին, եւ կառավարության որոշ անդամներ ամբողջ ուժով փորձում են հակադրվել դրան: Կառավարության այլ անդամներ էլ հասկանում են, որ արդեն ամոթ է հետապնդել այլ երկրի շահերը եւ փորձում են տեսք ընդունել, որ ինչ-որ բան անում են:
Հայաստանում ԱՄՆ դեսպան Ռիչարդ Միլզը երեկ Ազատություն ռադիոկոյանին տված հարցազրույցում հայտարարել է, որ ԱՄՆ-ը խրախուսում է Հայաստանի էներգետիկ դիվերսիֆիկացիան ու այլընտրանքների որոնումը՝ ինչպես էներգեկիրների աղբյուրների, այնպես էլ այլ տեսակների: Նա ասել է, որ Հայաստանն ինքնիշխան պետություն է եւ կարող է էներգետիկ եւ այլ հարաբերություններ հաստատել հարեւան Իրանի հետ: Իրանի դեմ պատժամիջոցների վերացումը դրա համար հնարավորություններ է բացել:
Ակնհայտ է, որ դիվերսիֆիկացիան ու Իրանի հետ հարաբերությունների հաստատումը հնարավոր են Հայաստանում Գազպրոմի մենաշնորհի եւ 2013 թվականի դեկտեմբերին ստորագրված հայ-ռուսական պայմանագրի վերանայման դեպքում:
Չնայած հայ պաշտոնյաներն ամոթխած խոսում են, որ դա չի խանգարում Իրանի հետ բանակցություններին, սակայն բոլորն արդեն հարց են տալիս, թե այդ դեպքում ինչն է խանգարում: Ստացվում է, որ խանգարում են հայ պաշտոնյաները, որոնք պաշտպանում են ռուսական պետական կորպորացիաների մենաշնորհներն ու շահերը:
Մինչեւ Ռուսաստանի կառավարությանը դիմելը Հովիկ Աբրահամյանը ճիշտ կաներ պարզեր, թե ով է խանգարում այլընտրանքի որոնմանն ու էներգետիկայի ապամենաշնորհացմանը:
Բանը հասել է հենց այդ կետին, եւ հիմա կամ ստիպված կլինեն նշել մեղավորներին, կամ էլ հայ-ռուսական գազային պայմանագրերի չեղարկման գործընթաց սկսել, որովհետեւ հակառակ դեպքում Գազպրոմն ու Ռուսաստանի կառավարությունը գինն իջեցնելու պատճառ չեն ունենա եւ թույլ չեն տա գազ գնել Իրանից:
Հայաստանի կառավարությունը պատրա՞ստ է այդ քայլին, եթե Գազպրոմի հետ բանակցություններն արդյունք չտան: