Պետբյուջեն ոչ մեկի հոր քսակը չէ. Սրապիոնյանը՝ պարգևավճարների մասին.« Երկիր»
2020-02-15 01:43:00
2020-02-15 01:43:00
Պարգևավճարները օրինական ներկայացվող կոռուպցիայի դասական օրինակ է՝ Yerkir.am-ի հետ հարցազրույցում ասաց բանասեր, ԵՊՀ դոցենտ Սերժ Սրապիոնյանը
«Որովհետև պետբյուջեն ոչ մեկի հոր քսակը չէ, որ մի որոշումով գումար հանեն»,-պարզաբանեց նա։Այս նյութը դիտել են - 8345 անգամ
Սերժ Սրապիոնյանը մեկ տարի աշխատել է իբրև Սփյուռքի նախարարի տեղակալ․ այն ժամանակ պարգևավճար տալու համար մեկ ամիս առաջ նախարարը դիմում էր ներկայացնում վարչապետին, վարչապետը դա քննարկում էր, հետո նոր որոշում՝ պարգևավճար տա՞, թե՞ չտա։
«Հիմա գրչի մի հարվածով գերատեսչության ղեկավարը գրում է և իր ուզած մարդկանց տալիս է միլիոններից ավելի պարգևավճար։ Ես իրավունք ունե՞մ մտածելու, որ սա կոռուպցիա է և այստեղ արդեն գործում է նախկիններին վերագրված ատկատի՝ վերադարձի օրենքները»,-ասաց նա։
Սրապիոնյանը միայնակ է աշխատել իբրև Սփյուռքի փոխնախարար, այնինչ օրենքը 3 փոխանախարար էր նախատեսում․ «Վարորդ չեմ ունեցել, մենք ստացել ենք 100 լիտր բենզին՝ մեկ ամսվա համար, այսօր 250-ից 300 լիտր բենզին են ստանում»։
Առաջին տարին պարգևավճար ընդհանրապես չի ստացել, որովհետև ամբողջ տարին չէր լրացել․ «Ընդ որում, տարվա մեջ 1 պարգևավճար էր տրվում, այն էլ՝ աշխատավարձի ոչ 100 տոկոսի չափով՝ հիմնականում 80 տոկոսի չափով»։
Տարբեր թափուր պաշտոններին տրված աշխատանքային ֆոնդից, գործուղումներից երբ խնայվել է շուրջ 15 միլիոն դրամ գումար, Սրապիոնյանը առաջարկել է նախարարին Նոր տարվա շրջանում մի քիչ ավելի շատ պարգևավճարներ տալ, որ մարդիկ Նոր տարի անեն, նախարարը պատասխանել է՝ իսկ ի՞նչ են արել՝ սարե՞ր են շուռ տվել, իրենց աշխատանքն են կատարել, սա պետական փող է և պետական փողին կպչելու իրավունք չունենք։ Եվ ամբողջ 15 միլիոն դրամը հետ է ուղարկել պետական բյուջե։
«Նախկիների և այսօրվանների տարբերությունը դա է․ սրանք շատ բարեհաջող կերպով պետբյուջեից հանում են, իսկ նախկին պաշտոնյաների մի զգալի մասը հետ էին ուղարկում պետբյուջե և սա դաս պիտի լիներ սրանց համար»,-ասաց նա։
Գերատեսչություններից՝ միայն Սննդի անվտանգության կոմիտեն մեկ տարվա ընթացքում շուրջ 1 միլիոն դոլարի պարգևավճար է տվել աշխատակիցներին, Արարատ Միզոյանը միայն փետրվար ամսում՝ 2 շաբաթ աշխատելու դիմաց մեծ պարգևատրումներ է տվել իր աշխատակազմին ու պատգամավորներին․ Սերժ Սրապիոնյանը, երբ այդ ամենը գումարում է, պարզում է, որ անգամ մեկ բնակարանը 100 հազար դոլարով հաշվելու պարագայում կարիքավոր 10 ընտանիք կբնակարանավորվեր։
«Իսկ եթե այս ամբողջ պարգևավճարները իրար գումարես, այն պոպուլիստական հայտարարությունները, թե սերտիֆիկատ ենք, տալիս աղետի գոտում բնակարան ենք տալիս․․․ սա ասում էին նաև նախկինները, փայտիկի մեկ հարվածով՝ իրենց գրպանները եթե չլցվեր, այդ բնակարանների խնդիրը կլուծվեր, կվերջանար։ Այդքան վիթխարի գումար են մսխում պետբյուջեից իրենց գրպանները հարստացնելու նպատակով և սա համարում են մարդասիրություն։ Մինչդեռ սա, ըստ էության, արհամարհանք է սեփական ժողովրդի նկատմամբ և արտոնյալների դասի ձևավորման յուրօրինակ գործընթաց»,-բնորոշեց նա։
Սերժ Սրապիոնյանը նաև չի մոռացել՝ երբ այսօրվա վարչապետը լրագրող էր և Ռոբերտ Քոչարյանի իշխանության ժամանակ 40 միլիոնով ինքնաթիռ գնվեց, այդ ինքնաթիռի դեմ այնպիսի հոդվածներ գրեց, որ քիչ մնաց մարդուն հայտարարեին Մուսոլինի․ «Հիմա իրենք դրա տասնապատիկ անգամ ավելին են տալիս, մի բան էլ ավելի։ Այդ ինչպե՞ս է լինում՝ նույն հանցագործ գործունեությունը 5 տարի առաջ անբնական է, 5 տարի հետո՝ բնակա՞ն է»։
Մանրամասն՝ տեսանյութում․