2020-11-16 23:35:00
PanARMENIAN.Net - Ադրբեջանի նախագահ Իլհամ Ալիևըհայտարարել է, որ Բաքուն մտադիր է հայկական կողմից փոխհատուցում պահանջել Քարվաճառի շրջանն ազատելու ընթացքում անշարժ և այլ գույքին հասցված վնասի համար։ Այդ մասին նա ասել է Ջեբրայիլում, որն ադրբեջանական զորքերը գրավել են Արցախի դեմ սանձազերծած պատերազմի ընթացքում, գրում է ՏԱՍՍ-ը։
«Հրավիրվելու են միջազգային փորձագետներ, կհաշվարկվի վնասը և մենք փոխհատուցում կպահանջենք»,- ասել է Ադրբեջանի նախագահը՝ շեշտելով, որ հայկական կողմը «պատասխան է տալու օրերս Քելբաջարում (Քարվաճառում) այրված տների, դպրոցների և հատված ծառերի համար»։
Քարվաճառի շրջանն առաջին տարածքն է, որ պետք է հանձնվի Ադրբեջանին Լեռնային Ղարաբաղում զինադադարի հաստատման վերաբերյալ ՀՀ, Ադրբեջանի և ՌԴ եռակողմ հայտարարության հիման վրա։ Սկզբից հայտարարվել էր, որ այն պետք է հանձնվի մինչև նոյեմբերի 15-ը, հետո ժամկետը 10 օրով երկարացվեց։ Բացի այդ նոյեմբերի 20-ին Ադրբեջանին է հանձնվելու Աղդամի շրջանը, իսկ դեկտեմբերի 1-ին՝ Լաչինի։
Այս նյութը դիտել են - 888 անգամ