ԱՀ ԿԳՄՍ նախարարության և անձամբ իմ անունից շնորհավորում եմ ձեզ դպրոցական Վերջին զանգի կապակցությամբ.Լուսինե Ղարախանյան
2021-06-04 20:40:00
Այս նյութը դիտել են - 2707 անգամ
2021-06-04 20:40:00
Սիրելի՛ շրջանավարտներ,
ԱՀ ԿԳՄՍ նախարարության և անձամբ իմ անունից շնորհավորում եմ ձեզ դպրոցական Վերջին զանգի կապակցությամբ:
Տարիներ շարունակ դպրոցը ձեզ համար եղել է կրթության, դաստիարակության, արժեքների ու վեհ գաղափարների ձևավորման ամենամեծ գանձարանը: Եվ այսօր դպրոցական վերջին զանգի ղողանջների ներքո հրաժեշտ տալով հարազատ կրթօջախին՝ բաղձանքների ու նպատակների իրականացման մեծ հավատով մուտք եք գործում հնարավորությունների աշխարհ։ Կհասնե՛ք ձեր սպասելիքներին, թե՛ ոչ, մեծապես կախված կլինի ձեր աշխատասիրությունից ու կամքից։
Ուսումնառության տարիներին դուք շրջապատված եք եղել մանկավարժներով, որոնց սերն ու ջանքերը մեկ նպատակ ունեին՝ դարձնել ձեզ ազնիվ, բանիմաց, նպատակասլաց, պատասխանատու, երկրին ու հայրենիքին նվիրյալ քաղաքացիներ: Եվ այս արժեքներն էլ պետք է շարունակաբար դնեք ձեր ապագայի կերտման հիմքում, քանի որ ժամանակներն ու իրադարձությունների ընթացքն ապացուցեցին, որ հզոր ու անպարտելի հայրենիքի հիմնաքարը որակական այդ հատկանիշների միահյուսումն է։
Վերջին զանգի ղողանջներն այս տարի չեն լսվի հայրենիքի հարյուրավոր կրթօջախներում, և բազմաթիվ շրջանավարտներ վերջին դասը կանցկացնեն ՀՀ-ի և ԱՀ-ի տարբեր դպրոցներում՝ առանց հարազատ կրթօջախին, սիրելի ուսուցիչներին և դասընկերներին հրաժեշտ տալու: Հայրենազրկման ու մարդկային կորուստների անսփոփ ցավն այսօր գրեթե ոչ մեկիս չի շրջանցել։
Թանկագի՛ն շրջանավարտներ, այսօր դուք գիտակցում եք, որ ձեր սերնդին ծանրաբեռ պարտք է կտակվել: Արդի ժամանակներում մեր առջև ծառացած բազմաթիվ մարտահրավերների լուծման ուղիներ որոնողները պետք է դառնաք նաև դուք, որպեսզի կարողանաք գալիք սերունդների աչքերին նայել ձեր հայրերի հպարտ հայացքով։ Սերն առ հայրենիք պետք է փնտրեք միմիայն սեփական ուժի ապավինումով և գիտելիքի զորության ճանաչողությամբ. սա է մեր ժամանակի հրամայականը։
Երախտագիտությունս եմ հայտնում ձեզ, հարգարժա՛ն ուսուցիչներ։ Անգնահատելի է ձեր նվիրումը մատաղ սերնդի կրթության ու հայրենանվեր զավակների դաստիարակության գործում: Աներկբայելի է, որ դուք այսուհետ ևս դավանելու եք հայրենասիրության և ազգային միաբանության սրբազան արժեքները՝ զորակցելով մեր հայրենիքի փրկությանն ու հառնումին։
Բարի՛ երթ ու հաստա՛տ քայլք…