Աշխարհը հետևում է մեզ, հետևում է նաև մեզ սովի մատնելու մարմաջով տարված երկրին, որով չափվում է արցախցիներիս դիմացկունությունը
2022-12-29 23:22:00
2022-12-29 23:22:00
Այս անգամ տարբեր էին արցախցիներիս գնումները, շատ տարբերվող աշխարհի մյուս երկրներից։ Ամեն տարի Ամանորի նախորդող օրերին առատ գնումներից դատարկվում էին խանութները։ Այս անգամ էլ Արցախում արտաքուստ թվում է` նույնն է, բայց ո՛չ, այն տարբերվող է... Եվ ինչո՞վ կամ գուցե ինչերո՞վ։ Չէ՛, սրտաճմլիկ խոսքեր չեմ գրի, երբ շատ-շատերի նման սիրտս դեռ դիմանում է անցած ու նոր դառնություններին, որով ապրում է Արցախը։
Այստեղ գնաճ չկա, որ նեղվենք, այստեղ տխրում ենք հերթականորեն տարբեր պարենային ապրանքների սպառման համար, երբ չգիտենք, թե երբ դատարկված դարակները այն շքեղ սուպերմարկետներում իրենց նախկին տեսքը կստանան։Այս նյութը դիտել են - 1354 անգամ
Ձեռքով շոշափեցի այն մեկ կգ-անոց ալյուրը, նորից հետ քաշեցի... Նախորդ օրը մեկ կգ գնել էի, թող այս անգամ ուրիշը վերցնի։ 10-ական ձու հասավ գնորդներիս, վերջում մնաց չորս հատ։ Վաճառողուհին դրեց մի կողմ` սա էլ մեկ ուրիշի համար...
Այս օրերին ինձ թվում է` ամենատխուր մարդիկ խանութներ թե սուպերմարկետներ մտնող արցախցիներն են... Լուռ են, առանց խոսքի, երբ նկատում են, որ ձյան հալվելու նման սպառվում է ամեն ինչ։ Բայց ձյան հալվելուց ջուր է մնում, իսկ սննդի սպառվելուց, հակառակ մեր հոգում նստվածք տված ծանր զգացողությունից, ինքներս մեզ հուսադրում ենք` պիտի հաղթահարել, Հանուն Արցախի գոյության պիտի դիմանալ։
Սոված չենք և ոչ էլ քաղցի մատնված, բայց երբեմն ամաչում ենք ձայն հանել, որ չունենք... Անուններ չեմ տա, թե ինչեր չունենք, դրանք շատ են, ավելի հեշտ է ասել, թե ինչ ունենք....Լռում ենք ունեցողների կողքին, որ ժամանակին ձմեռվա պաշար են հավաքել...
Ասում էին` դժվար ձմեռ է մեզ սպասվում, պիտի դիմանանք։ Կարծում էինք` խոսքը սառնամանիքներին դիմանալու մասին է, պարզվեց` քաղցի սառնամանիքին պիտի դիմանալ ու դիմանում ենք։
Քաղցած չենք և ոչ էլ` սոված, բայց երբեմն հեռու-ն ենք գնում մեր մտածումներով` իսկ եթե սովածանա՞նք։
Աշխարհը հետևում է մեզ, հետևում է նաև մեզ սովի մատնելու մարմաջով տարված երկրին, որով չափվում է արցախցիներիս դիմացկունությունը։ Մենք մենակ չենք, տեր ու տիրական ունենք, հայությունն էլ մեզ հետ է, մեր խնայողությամբ մենք կփրկվենք, երբ գլուխներս բարձր մենք աշխարհին ենք նայում, աշխարհը` մեզ։
Նատաշա Պողոսյան