Քաոս ու արնահեղություն բանակում. քաղաքական իշխանությունները պե՛տք է կրեն պատասխանատվություն
2024-01-11 23:51:00
2024-01-11 23:51:00
Վարչապետ Նիկոլ Փաշինյանն այցելել է ՊՆ՝ գերատեսչության 2023-ի գործունեության հաշվետվությունը քննարկելու նպատակով: Ինչպես հաղորդվում է, պաշտպանության նախարարն ու տեղակալները վարչապետին են ներկայացրել իրենց համակարգման ոլորտներում իրականացված աշխատանքները, առաջնահերթություններն ու գերակայությունները՝ անդրադառնալով նաև գերատեսչության կողմից իրականացված բարեփոխումներին և ձեռնարկված քայլերին։Այս նյութը դիտել են - 689 անգամ
Այս օրերին ամենաքննարկվող թեմաներից է դարձել բանակի ներսում տեղի ունեցողը, որն այլ կերպ, քան ողբերգություն, չես համարի: Իհարկե, բանակում ոչ մարտական պայմաններում արձանագրվող զոհերի հարցը նոր չէ, քանի որ այդ խնդիրը տասնամյակներ ի վեր ուղեկցել է զինված ուժերին, բայց այն, ինչ որ կատարվում է հիմա, իսկապես արտառոց է:
Հետաքրքիր է, որ ԱԺ պաշտպանության ու անվտանգության հարցերի հանձնաժողովի նախագահ Անդրանիկ Քոչարյանը հարցին, թե արդյոք նախարար Պապիկյանը չի՞ պատրաստվում հրաժարական ներկայացնել, բացասական պատասխան է տվել՝ հայտնելով, որ պետք է պատժվեն նրանք, որոնց անմիջական մեղքով են տեղի ունեցել ողբերությունները:
Ոչ մարտական պայմաններում արձանագրվող մահերի կամ ինքնասպանությունների ու սպանությունների թվաքանակի աճը լավագույն ցուցնիշն է այն բանի, թե իրականում ինչ է կատարվում բանակի խորքում՝ բոլորի աչքից հեռու, ոչ բոլորին տեսնելի: Բանակի ներկայիս վիճակի համար թիվ մեկ պատասխանատուն, այո՛, հենց երկրի քաղաքական իշխանություններն են ու անձամբ նախարարը, որ տվյալ դեպքում ՔՊ-ի թիմն է ներկայացնում: Ներքևներում տիրող քաոսը հետևանք է վերևներում գտնվողների անտարբերության ու աչքաթողության: Ասվածը վերաբերում է առաջին հերթին զինված ուժերին, որն ամենից զգայուն օղակն է այս դեպքում:
Ի դեպ՝ հետաքրքիր է, որ Փաշինյանը դեռ 2018-ին հայտարարում էր, որ բանակում արձանագրվող զոհերի թեման չպետք է դառնա ընդամենը լրատվականների կամ մամուլի գլխագրեր, այլ պետք է ամեն մի դեպքի հետևից գնալ մինչև վերջ՝ արմատախիլ անելու արատավոր երևույթները: Արդյոք հիմա այդ տրամաբանությա՞մբ է աշխատում Սուրեն Պապիկյանը, որի աշխատանքային արդյունավետության վերաբերյալ շարունակում են հնչել հիմնավոր կասկածներ:
Բանակը Հայաստանի ողնաշարն է: Կլինի մարտունակ ու կենսունակ բանակ, կլինի Հայաստան, չի լինի, չի լինի երկիր առհասարակ: Այնպես որ՝ եթե իշխանություններն իսկապես մտադիր են ապացուցել, որ իրենց հասցեին հնչող հայտնի մեղադրանքները տեղին չեն, ապա ցանկացած գնով պետք է բացառվի նմանօրինակ ողբերգությունների կրկնությունը, մեղավորներն էլ պետք է պատժվեն: