Ըստ ամերիկահայ երգիչ Ալֆրեդ Գալստյանի՝ մինչև Հայաստանում վիճակը չլավանա, ո՛չ մեկն էլ մշտական ապրելու չի գա...(Տեսանյութ)
2016-03-05 02:10:00

Հարցազրույց՝ ամերիկահայ երգիչ Ալֆրեդ Գալստյանի հետ...

Հարգելի Ալֆերդ, գիտեմ, երկար ժամանակ է, որ բնակվում եք Լոս Անջելեսում: Հիմա Հայաստանում եք: Կասեք ի՞նչն է Ձեզ բերել Հայրենիք: 

-Ես շատ հաճախ եմ այցելում Հայաստան, շատ եմ սիրում հայրենիքս:  Այս անգամ իմ մեծ սերն է բերել հայրենիք: 

Անձնականը՝ անձնական, իսկ հնարավո՞ր է հայ հանդիսատեսը հայրենիքում ձեզ տեսնի համերգով, կամ ինչ-որ միջոցառման շրջանակներում: 

-Այո՛, Հայաստանում  արդեն առաջարկ կա,համերգի պատրաստվելու  իմ և կնոջս՝  Անուշ Պետրոսյանի հետ համատեղ:  Ի դեպ ՝  ունեմ բազում հրավերներ տարբեր երկրներից էլ: 

Կասե՞ք երեք կետ, որը կառանձնացնեիք Լոս Անջելեսի և այստեղի արվեստագետների միջև:

-Տարբերություններ շատ-շատ կան , բայց հիմնականը նա է, որ առաջինը մեր մոտ՝ Լոս Անջելեսում,  հայ արվեստագետները խնջույքներում միայն հայերեն են երգում, իսկ Հայաստանում, առաջին երգից հետո՝  անցնում են ռուսերենի:  Եթե առիթը հայկական է, ուրեմն՝  եկեք մերը պահենք,  օտար ազգը երբեք իրենց հարսանիքներում հայերեն չի երգում: 

Մեր մոտ արվեստագետները միայն արվեստով չեն զբաղվում , կողքից ամեն մեկը ուրիշ բիզնեսով էլ է զբաղվում , իսկ Հայաստանում ՝ այդպես չէ: Լոս Անջելոսում  միայն ուրբաթ, շաբաթ, կիրակի օրերն  են արվետսագետները իրենց արվեստով զբաղվում , բայց Հայաստանում ՝ դա ամեն օր է: Հնարավոր է, որ այդ ամենը  գալիս է երկրի դրվածքից: 

Երևի երրորդ կետն  էլ այն է, որ երգելու ոճը շատ տարբեր է մեր մոտի երգիչների և Հայաստանում բնակվող երգիչների միջև: 

Լոս Անջելեսում արվեստագետների մեջ նախանձը և դրա հետևանքները ինչպե՞ս են դրսևորվում: Իրար օգնում են, թե՞ խանգարում, դիմացինի հաջողությամբ ուրախանում են, թե՝ թշնամանում: 

-Երկու տարբերակն էլ,   գործում է,  և՛ Լոս Անջելեսում  և՛ հայրենիքում:  Դա իմ կարծիքով բոլոր գործերում է այդպես: Բայց ավելի գերադասելի կլիներ, որ մենք միասնական լինեինք, չէ որ մի ձեռքը երբեք ծափ չի տալիս: Ցավոք սրտի,  մեր հայ ազգը իրար թիկունք -թիկունքի չի կանգնում: Հին ժամանակներում մեր պապերն են կանգնել և հիմա նրանց շնորհիվ է ,որ ՀԱՅԱՍՏԱՆԸ  գոյություն ունի: 

Ըստ Ձեզ, վաստակավոր կոչումը ինչպես է նվաճվում, խնամի -ծանոթով, թե՝ ժողովրդի գնահատականով: Չե՞ք կարծում , որ ամեն արժան-անարժան էժանացրեցին կոչումները :

-Ինչպես Հայաստանում , այդպես էլ Ամերիկայում , երկու երկրներում էլ խնամի ծանոթով է, կամ ՝  լավ գումարի դիմաց: 
Անուններ չեմ տալիս, բայց շատ արվեստագետներ էլ կան, որ իրենք իրենց են շնորհում այդ մրցանակը: 
Ինձ համար ամենամեծ մրցանակը այն է,որ դրսում , և՛ Երևանում, և՛ Լոս Անջելեսում, ժողովուրդը մոտենում է և ուզում է նկարվել , կամ՝ այնքան մեծ արձագանքներ եմ ստանում , ջերմություն , որ անփոխարինելի է, չհաշված բոլոր այն հաղորդագրությունների, որոնք ստանում եմ օրվա ընթացքում:  Իմ կարծիքով դրանից մեծ մրցանակ չկա: 


Օտարության մեջ, ինչպե՞ս եք վաստակում օրվա ապրուստը, երգելով հնարավո՞ր է ապրելու համար պայմաններ ապահովել:  

- Լոս Անջելեսում անհնար է, որ միայն երգելով ապրես ու ընտանիք պահես, կողքից ամեն մարդ էլ բիզնեսով է զբաղվում: 

Ի՞նչքան ժամանակով եք Երևանում: Հնարավո՞ր է , որ մնաք մշտական բնակության:

-Դեռ 4-5 ամիս էլ լինելու եմ Հայաստանում , բայց հիմնական բնակություն 
կհաստատենք Լոս Անջելեսում: Այնտեղ են իմ հարազատներն և ընտանիքս: 
Ինչքան էլ, որ կյանքս տամ Հայրենիքի համար, մինչև իմ կարծիքով Հայաստանում վիճակը չլավանա, ոչ մեկն  էլ չի թողնի այնտեղի կյանքը ու չի գա: 

Ամենակարևորը նաև այն է, որ այնտեղ Օրենք կա,  հայությունը չի թողնի այնտեղից չի գա, քանզի օրենքն այնտեղ գործում է բոլորի համար, կապ չունի ում տղան ես, կամ ինչքան փող ունես: 

 Գաղտնիք չէ,որ Ձեր կինը նույնպես երգում է, հնարավո՞ր է հանդիաստեսը ձեզ տեսնի համատեղ համերգով:

-Ինչքան որ նկատել եք,  մենք վերջերս միշտ իրար հետ ենք երգում, և շատ շուտով մեր համատեղ համերգն է լինելու Հայաստանում: Երկուսիս ոճը շատ տարբեր է, դա գալիս է երևի նրանից , որ տարբեր մշակույթների մեջ ենք մեծացել :

Ձեր կնոջը ձեզ մրցակից չե՞ք տեսնում : Սոցիալական ցանցերում նկատելի է, որ Ձեր կինն ավելի շատ հետևող և երկրպագուների մեծ բանակ ունի: 

-Ես այնքան ուրախ եմ, որ իմ տիկնոջը ավելի հետևողներ կան՝ քան ինձ : Իմ մեծ նպատակն է, որ նա նոր բարձունքներ նվաճի : Հանդիսատեսը տարբեր ճաշակի է, ես իմ հանդիսատեսն ունեմ,  Անուշիկը ՝ իրենը: Եթե ասեն,որ Անուշիկը ինձանից շատ ավելի լավ է երգում, հավատացե՛ք,  հազար անգամ ավելի ուրախ կլինեմ: 

Երբ վերադառնաք Լոս Անջելես և ձեր տիկնոջ հետ համատեղ նախաձեռնությամբ համերգով հանդես գաք, ըստ ձեզ, ի՞նչ արձագանք կունենա, և արդյո՞ք շատերի նախանձը չի շարժի : Պատրաստ ե՞ք թշնամիների նոր բանակին: 

-Անուշիկին, լոսանջելեսահայերը  արդեն անհամբեր սպասում են, թե  երբ է  նա  այնտեղ լինելու :
 Շատ քիչ ժամանակահատվածում նա նվաճեց այն բարձունքը, որին հասնելու համար  շատ երգիչ-երգչուհիներին տարիներ է պետք: Իմ ամբողջ նպատակը այն է,որ նա ավելիին հասնի, քանի որ նա իր մեջ այդ հնարավորությունները ունի : Եվ մի բան էլ ավելացնեմ,այսօր այնքան երգիչներ կան, որ ցանկանում են Անուշիկի հետ դուետ երգել, իսկ ընտրությունն,  իհարկե,  Անուշիկինն է: 

Սփյուռքի հայության հետ է հեշտ շփվելը, թե՝ հայաստանաբնակների:

-Ասեմ, որ շատ տարբեր են որպես լսարան, և որպես հանդիսատես : Սփյուռքի  հայությունը շատ նրբանկատ է, շատ լավն են , միշտ բարի ու պոզիտիվ: 

 Հարգելի Ալֆրեդ, կպատասխանեք մեր հարցազրույցի վերջին ամփոփիչ հարցը. շուտով ինչո՞վ կզարմացնի Ալֆրեդ Գալստյանն ու Անուշ Պետրոսյան զույգը հանդիսատեսին: 

-Ես երևի չբացեմ փակագծերը , ընթացքում կերևա: 

 Շնորհակալություն հարցազրույցի համար: Մաղթում եմ ձեզ Սեր, Երջանկություն և ստեղծագործական մեծ վերելք:

-Նմանապես , անչափ շնորհակալ եմ  ձեզ և  USArmenianews.com լրատվական կայքին:  

Այս նյութը դիտել են - 18507 անգամ