ԳԼԱԴԻԱՏՈՐ ԵՎ ԴՈԿՏՈՐ ԼԻՍԿԱՆ ...
2016-03-24 15:02:00

Լիսկայի հայտարարության տեքստը «վերջն» էր՝ մարդը խոսում է բռնության համար պատասխանատվության ենթարկելու մասին: 

Ասում է՝ Գորիսի ոստիկանապետը ինքն իրեն գովազդելու նպատակով է տվել իր անունը: 
Մի քանի շիշ տնական արաղով ռուսական ինչ-որ կոոպերատիվ «ակադեմիայում պատմափիլիսոփայական գիտությունների դոկտորի թուղթը» գրպանը դրած,  Սյունաց բդեշխը «լավ տղու» իր պատկերացրած կերպարի մեջ է: Նրան թվում է՝ իրեն ամեն ինչ կարելի է, մյուսներին՝ ոչ: 

Հայ քաղաքական հետնախորշերում թրև եկող, հնամաշ մի կերպարի՝ որպես «մամուլի հետ տարվող աշխատանքների համակարգող» գործուղել է հնարավոր բոլոր խմբագրություններ, որպեսզի «վճարովի հիմունքներով» տարածել տա Գորիսի ոստիկանապետի մասնակցությամբ տեսանյութը: 

Հարցը ոստիկանապետը չէ՝ եթե հանցանք է գործել, թող պատասխան տա: 

Հարցը ՝ Լիսկան է:

 Քիչ է պատահել, որ Սյունիքում մեկն ու մեկը հանդգնի նրա «թրի տակով» չանցնել ու դեռ մի բան էլ հակառակվել, իսկ Գևորգ Ազիզյանին դեռ չէր հասցրել «թրի տակով անցնել տալ» կամ մի բան իր ուզածով չի եղել: 
Համենայն դեպս, Լիսկան էլ ջղայնացել է՝ «Ես ուժեղ տղա եմ, ուզում են ինձ ջարդեն»: 

Ուժեղ ասելով երևի նկատի ունի, որ Գորիսում և ողջ Սյունիքում մարդիկ իրենից վախենում են, ահաբեկված, ձեները կտրած ապրում են, մի մասն էլ իրեն քծնելով գլուխը պահում է, մի պատառ թռցնում, յոլա գնում: Դե, առարկություն ունեցողներին էլ, հայտնի բան է, թե «ուժեղ տղան» ինչ է անում: 

Այսինքն՝ եթե խորը մտածենք, Գևորգ Ազիզյանը լավ է պրծել. Բուդաղյանների և էլի շատերի պատմությունը՝ ապացույց: 

Եթե ծեծելու համար պատասխանատվության կանչելը պարտադիր լիներ, «գլադիատոր և դոկտոր» Լիսկան պիտի իր բաժին ողջ կյանքը միայն պատասխան տար: Իսկ եթե նաև սպանելու, բռնաբարելու, ահաբեկելու համար պատասխանատվությունը հանկարծ պարտադիր լիներ՝ Լիսկայի ողջ գերդաստանը պիտի պատասխանատվության կանչվեր: 

Թող ծառայողական քննությունը պարզի՝ ոստիկանապետը ինչու է իրեն այդպես պահել, թող պարզեն՝ որտեղ և ինչու է հրահրվել այդ ամենը, ինչու են մարդուն հասցրել-դրդել այդ վիճակի և ծեծվելուն զուգահեռ՝ կարգին էլ նկարահանել ու նկարահանվել: 

Տարօրինակ է, չէ՞:

 Բոլորս էլ գիտենք, որ տղամարդուն միշտ կարելի է այնպես հունից հանել, որ հայհոյի ու բռունցքներին դիմի՝ մոռանալով պաշտոնի և մնացած ամեն բանի մասին: Գուցե այստե՞ղ պետք է փնտրել «գլադիատորական և դոկտորական» հետք: 

Այն, որ Լիսկան ամեն բանի ընդունակ է՝ իրեն չհնազանդված մարդուն արանքից հանելու համար՝ կասկած չկա, բայց որ «օպերացիայից» հետո բարոյախրատական հայտարարության տեքստ կտարածի՝ գաղտնի տեսագրության տարածմանը զուգահեռ՝ արդեն չափից դուրս շատ է: 

Չնայած զարմանալին այն է, որ Հայաստանում կատարվող որևէ բանի վրա դեռ զարմանում ենք: 
  Այն պահին, երբ Լիսկային «դաբրո» տվեցին՝ խայտառակ պատմություններից 
հետո՝ նորից որպես մարզպետ Սյունիք վերադառնալու, միանգամայն իրավացիորեն իրեն  արդեն համարում է Սյունաց բդեշխ ու ընդհանրապես Հայաստանի «լավ տղերքից»: 

Հայաստանում, իրոք, լավ տղերքը քչություն են անում, մնացածը հենց դրա պատճառով է:

Մարգարիտ Սարգսյանի ֆեյսբուքյան էջից

Այս նյութը դիտել են - 1513 անգամ