2016-04-09 21:23:00
«Այն, ինչ տեղի ունեցավ, իրականում կառավարող վարչախմբի պատճառով է, որը տանում է ժողովրդին դեպի ոչնչացման»,- ԳԱԼԱ-ի հետ զրույցում ասաց «Նոր Հայաստան» ճակատի անդամ, երկար տարիներ ՀՀ ՊՆ կենտրոնական ապարատում պաշտպանության համակարգի մասնագետ աշխատած Վարուժան Ավետիսյանը:
«Եթե սառը գլխով դատենք տեղի ունեցածը, պիտի հասկանանք, որ շատ ոգեւորիչ ու կարեւոր է ազգային զարթոնքը, անգնահատելի արժեք է մեր երիտասարդների, մեր զինվորների զոհաբերության պատրաստակամությունը, բայց պարտավոր ենք առհասարակ հասկանալ, որ այդ զոհաբերությունը պետք է անիմաստ չլինի: 30 տարի առաջվա մոտեցումներով, մտածելակերպով, այն ժամանակվա լավ, թե վատ դերակատարներով այսօր փորձել ժամանակակից մեթոդներով պատերազմում արդյունքի հասնել՝ ուղղակի ողբերգություն է: Մենք կարիք ունենք պետական փոփոխության, ժողովրդավարության հաստատման, ժողովրդի մոբիլիզացիայի՝ համախմբման իմաստով, տեխնոլոգիաների զարգացման: Մենք պետք է ժամանակակից պաշտպանական համակարգ ունենանք, պրոբլեմներ են սրանք, որոնց մասին գիտեինք, տարիներ ի վեր խոսում էինք, սակայն, ցավոք սրտի, միայն ռազմական գործողությունների վերսկսումը ստիպեց այս հարցերին վերադառնալու քաղաքական օրակարգ»:
Ըստ Վարուժան Ավետիսյանի՝ ժամանակն է խոհեմ եւ սթափ լինել, հասկանալ՝ ինչ է կատարվում, եւ հասկանանք, որ ազգային համերաշխության հասնելու համար պետք է քայլեր կատարել:
«Բնականաբար այդ քայլերն ակնկալվում են վարչախմբից, իրենք պետք է տեսնեն անդունդը, որը գոյություն ունի իրենց եւ ժողովրդի միջեւ:
Քաղբանտարկյալներին ազատ արձակելը, լայն համաներում հայտարարելը, սոցիալական արդարացման համար քայլեր կատարելը, օլիգարխների ձեռքում կուտակված, ապօրինի կուտակված ունեցվածքը պաշտպանության նպատակների համար տրամադրելն առաջնահերթ քայլերը պետք է համարվեն, որովհետեւ առանց այդ քայլերի, հին մեթոդներով եւ «կեցցե ուռայական» տրամադրություններ ստեղծելով՝ դրանք ռեժիմի վերարտադրությանը ծառայեցնելով եւ կատարված անվտանգության ոլորտում ոճրագործ գործունեությունը քողարկելով՝ մենք ուղղակի ինքնասպան ենք լինելու, դա վերջն է: Մենք չգիտենք, թե դեռ հակառակորդն ինչ քայլեր է մտածել եւ հաջորդ հարվածը երբ է հասցնելու»:
Ըստ Վ. Ավետիսյանի՝ բանակցություններն, ըստ էության, վաղուց ի վեր ադրբեջանական կողմն օգտագործում է ժամանակ շահելու եւ իր տնտեսական պոտենցիալը հզորացնելու նպատակով: Միակ տարբերակը, ըստ Վարուժան Ավետիսյանի, հակառակորդի նկատմամբ ուժն օգտագործելն է: Մեր այն հարցին, թե արդյոք դրա հնարավորությունը կա, արդյոք պատրաստ ենք, Վարուժան Ավետիսյանը պատասխանեց.
«Ունենք այդ հնարավորությունը: Այս պահին կարող ենք, բայց եթե ժամանակ ձգձգենք, որոշ ժամանակ անց չենք կարողանա»:
Հիշեցնենք, որ Ս. Սարգսյանը հայտարարում էր, որ մենք կռվում ենք 80-ականների զենքով: Վարուժան Ավետիսյանն ասաց. «Ես ՊՆ կենտրոնական ապարատում պաշտպանության համակարգի մասնագետ եմ եղել երկար տարիներ, Ս. Սարգսյանից ոչ պակաս գիտեմ, թե մենք ինչ ունենք եւ ինչ չունենք: Առայժմ եղած ներուժով կարող ենք իրականացնել հաջող ծրագիր»:
Մեր այն հարցին, թե տպավորություն էր, որ հայկական կողմը կարող էր անել ավելին, քան արեց՝ չօգտագործելով ձեռքի տակ եղած բոլոր հնարավորությունները, ինչո՞ւ, Վ. Ավետիսյանը պատասխանեց. «Որովհետեւ գերագույն գլխավոր հրամանատար կոչվածը վախկոտ է, նա վախենում է ժողովրդին մոբիլիզացնելուց: Վախենում է, որ մոբիլիզացված, ոգեւորված մղումներով տոգորված հայ ժողովուրդը կդառնա ահռելի ուժ ոչ միայն արտաքին թշնամու համար, այլ նաեւ ներքին: Նա վախենում է իր շահը գիտեցող, գիտակցված պայքարող ժողովրդից»:
Քրիստինա Մկրտչյան
Այս նյութը դիտել են - 2808 անգամ