2015-12-14 08:14:00
Միացյալ Նահանգների կողմից ղեկավարվող հակաահաբեկչական կոալիցիայի ջանքերով «Իսլամական պետություն» խմբավորումը՝ Դաեշը զրկվել է արտաքին ֆինանսավորումից: Պենտագոնը հայտարարել է, որ ԱՄՆ-ի ղեկավարած կոալիցիայի կողմից ռմբակոծումների արդյունքում ոչնչացվել Դաեշի երեք բարձրաստիճան առաջնորդ, այդ թվում ահաբեկիչների ֆինանսական հոսքերը կառավարող Աբու Սալահը:
«Սալահը մեր կողմից վերջին ամիսներին ոչնչացված ֆինանսական ցանցի երրորդ անդամն էր: Նրան ոչնչացնելով` մենք զրկեցինք կազմակերպությունը ֆինանսավորում ստանալու հնարավորություններից», - հայտարարել է կոալիցիայի խոսնակ գնդապետ Սթիվ Վարենը:
VOA-ի փոխանցմամբ, կոալիցիայի խոսնակ գնդապետ Սթիվ Վարենը հաղորդում է, որ ռմբակոծումների արդյունքում Իրաքի Ռամադի քաղաքում ոչնչացվել է Դաեշի ընդհանուր առմամբ 350 զինյալ: Ռամադիի մոտ ահաբեկիչների դեմ պայքարում լուրջ հաջողությունների մասին է հաղորդել նաեւ Իրաքի բանակը:
«Սա հզոր հաղթանակ է, որին մեզանից լուրջ ջանքեր պահանջեց», - ավելացրել է Իրաքի բրիգադային գեներալ, Իրաքի միացյալ շտաբի խոսնակ Յահյա Ռասուլը:
Իրաքի գեներալը հայտնել է, որ իրաքյան բանակը նախատեսում է մոտ ապագայում վերջնականապես ազատագրել Ռամադի քաղաքը՝ մաքրելով այն ահաբեկիչներից:
Նախօրեին Միացյալ Նահանգների պաշտպանության նախարար Էշթոն Քարթերը նշել էր, որ Ռամադիի ազատագրումն ընթանում է չափազանց դանդաղ, սակայն հաստատել, որ ի վերջո քաղաքն ազատագրվելու է ԴԱԵՇ-ի զինյալներից:
Այս նյութը դիտել են - 1534 անգամ