ԱՄՆ-ի նախագահի ընտրությունների հանրապետականների միակ թեկնածու Դոնալդ Թրամփը ոչ մի կերպ չի կարողանում արժանանալ կուսակցության ղեկավարների համակրանքին: Հինգշաբթի օրը հանրապետականների ամենաազդեցիկ կուսակցականներից՝ Ներկայացուցիչների պալատի խոսնակ Փոլ Ռայանը ասել է, թե ինքը պատրաստ չէ Թրամփին աջակցել որպես կուսակցության առաջադրած նախագահի թեկնածու:

Ռայանը նախկինում քննադատել է Թրամփին՝ վերջինիս այն հայտարարության համար, որ եթե ինքը չառաջադրվի որպես կուսակցության նախագահի թեկնածու, ապա հունիսին կայանալիք Հանրապետականների ազգային համագումարի ժամանակ իր աջակիցները կարող են խռովություններ սկսել:

Թրամփն ասել է, թե ինքը պատրաստ չէ հետևել խոսնակ Ռայանի օրակարգին, սակայն չի բացառում համագործակցության հնարավորությունը՝ ի շահ ամերիկացիների:

Թրամփը չի արժանացել նաև շատ հեղինակավոր այլ հանրապետականների համակրանքին, ներառյալ ԱՄՆ-ի նախկին նախագահներ ավագ Ջորջ Բուշի և Ջորջ Բուշ կրտսերի համակրանքին: Նրանք երկուսն էլ չեն մասնակցելու Հանրապետականների ազգային համագումարին և ձեռնպահ են մնում Թրամփի վերաբերյալ իրենց կարծիքը արտահայտելուց:

Ստեղծված այս իրավիճակից փորձում է օգտվել դեմոկրատների առաջատար թեկնածու Հիլարի Քլինթոնը։ Նրա ընտրարշավը փոխում է մարտավարությունը՝ կենտրոնանալով հանրապետականների այն ընտրողների վրա, ովքեր հիասթափված են առաջատար թեկնածու Դոնալդ Թրամփից՝ նրանց վստահեցնելով, որ Թրամփի լավագույն այլընտրանքը ինքն է:

Դեմոկրատական կուսակցության շրջանակներում Հիլարի Քլինթոնի անմիջական մրցակից սենատոր Բեռնի Սանդերսն էլ շարունակում է հաջողությունների հասնել այն նահանգներում, որտեղ իր մրցակիցը պատնեշի առջև է կանգնած: Սանդերսը ճամփորդել է Արևմտյան Վիրջինիա նահանգ և խոսել հանքահորերի շուրջ՝ նշելով որ բնապահպանության իր ծրագրերը իրագործելու արդյունքում, տուժած բոլոր քաղաքացիներին հնարավորինս շուտ կցուցաբերվի կորուստները վերականգնելու հարցում աջակցություն:

Արևմտյան Վիրջինիա նահանգում Հիլարի Քլինթոնը հակազդեցության է դեմ առնում, այն խոստումի համար, որ ընտրվելու դեպքում ինքը կփակի բոլոր հանքահորերը։

Արևմտյան Վիրջինիա նահանգում նախնական ընտրությունները անցկացվելու են երեքշաբթի օրը: