2016-06-01 02:05:00
Մուկը չի թողնում, որ իր մասին մոռանանք՝ ամեն օր առիթ է տալիս, որ հասկանանք Հայաստանի ողբալի վիճակը:
Վարչապետի դերը քանի գնում ՝ ավելի հավեսով է խաղում, իրեն մտովի համեմատում է Հայաստանի ու աշխարհի վարչապետների հետ և ուզում է ապացուցել, որ ինքը դրանցից պակաս տղա չէ:
Խորհրդականներն ու խորհրդականուհիները, երևի, ուսումնասիրում և հուշում են, թե էլ ինչ քայլեր անի, որ վարչապետի նման դառնա: Որ բոլորին հավաքի բուռը, բոլորին օգտագործի իր մեծամեծ ծրագրերի համար: Էդ բոլորը առանձին-առանձին մտածում են, թե իրենք Մկանը հարիֆացնում, փողերն ուտում են, Մուկն էլ մտածում է՝ ինքն է հարիֆացնում:
Խեղճ Հայաստան… Մուկը ուզում է ապացուցել, որ ինքը ամեն ինչ է՝ զորավար է, տնտեսագետ է, ֆինանսիստ է, քաղգործիչ-քաղաքագետ է, բարեգործ, մեդիափորձագետ է, հոգեբան ու գողականով ՙճիշտ՚ տղա է: Մի տեսակ՝ Արա Գեղեցիկի, Նժդեհի ու Սվոյ Ռաֆի ՙթույն՚ խառնուրդ…
Կոռուպցիայի դեմ պայքարի մասին ահեղագոչ հայտարարություններ արեց՝ մտքում հաշվելով, թե 15 միլիոն եվրոյի քանի կիլո ու ինչ տեսակի պանիրներ կարող է առնել: Բա եթե հանկարծ վաղը եվրոպաներից ասեն, որ մկների դեմ պայքարի համար են գրանտ տալիս, կարծում եք՝ կվարանի՞.շատ վճռական և գործից հասկացողի իրավունքով կասի, որ մկները անիծում են ոչ միայն գյուղատնտեսության հերը, ոչ միայն ընկնում են և հարամում յուղի կարասները, այլև ապականում են ամեն ինչ, ինչին որ դիպչում են: Կասի ու կսկսի կատաղի պայքարել թիվ մեկ կրծողի՝ ինքն իր դեմ:
Կոռոիպցիայից բացի՝ Մուկը կատաղի պայքար է սկսել ոստիկանության դեմ. արտաբյուջետային պանրի հոտ է առել: Ծիծաղելի էր տեսնել, թե Մուկն ինչ եղանակով է ուզում դա անել:
Մուկը չգիտի, որ Գառնիում կատարվածը՝ գառնեցիների համախմբված ընդդիմանալը, լենդլորդական իր ախորժակին, նախադեպ է: Ըստ Մկանը մոտ կանգնած մեր աղբյուրի՝ Մուկն ասել է, որ կյանքում էլ Գառնի չի գնալու: Կգա ժամանակ, որ Մխչյանից բացի՝ ուրիշ տեղում հայտնվել չի կարողանալու և վերադառնալու է արմատներին: Ու ինքն էլ չի հավատալու, որ Հայաստանի վարչապետի կաբինետում նստել-վեր է կացել, խորհրդակցություններ անցկացրել, կառավարության նիստեր վարել, երազել բոլոր հակառակորդներին շարքից հանելու մասին:
Կրակած մազերը կորցրած, ներկը թափած գլուխը կախ՝ բիբար-բադրիջանի վնասատուների դեմ է պայքարելու: Ինքն էլ չի հավատալու, որ երկրի ղեկը ձեռքին է եղել: Մենք էլ չենք հավատալու:
Ճիշտն ասած, հիմա էլ չենք հավատում, որ Մուկը վարչապետ է. ո՞նց կարող է նման բան լինել: