2016-06-13 13:13:00
Նուբարաշենի խճուղու մոտակայքում հունիսի 4-ին տեղի ունեցած սպանության, դրա մեջ մեղադրվողների մասին իրարամերժ տեղեկություններ են հայտնվում լրատվամիջոցներում: Սպանված Եղիշե Խաչատրյանի կինը՝ Փառանձեմ Մեյթիխանյանը NEWS.am-ին ասել էր, թե դեպքին ականատես իր սկեսրոջ եւ Խաչիկ Կոսյանի միջեւ առերեսում է տեղի ունեցել եւ սկեսուրը՝ տիկին Ասյան ճանաչել է Խաչիկին ու ասել, որ նա է եղել ծեծկռտուքի մասնակիցներից մեկը:
Կոսյանի փաստաբանը՝ Վաչագան Քոսյանը, մինչ այդ մեզ հետ զրույցում, այժմ նույնպես պնդում է, որ տեղի է ունեցել ոչ թե առերեսում, այլ ճանաչում, որի ընթացքում «ոչ ոք Խաչիկին որպես ծեծկռտուքին մասնակից անձ չի ճանաչել»: Փաստաբանը նման հայտարարությունները գնահատում է «որպես էմոցիոնալ հողի վրա ասված խոսքեր» եւ հավելում, որ վայրը, որտեղ տեղի է ունեցել սպանությունը, վատ լուսավորված է, ինչն էլ գուցե շփոթության պատճառ է հանդիսացել: Սպանվածի մայրը, ըստ փաստաբանի, գուցե Խաչիկին տեսել է դեպքի վայրում, սակայն վերջինս այդտեղ եղել է այն ժամանակ, երբ Խաչատրյանը արդեն մահացած է եղել ու նույնիսկ մի քանի մետր հեռու է կանգնած եղել նրանից:
Ըստ փաստաբանի. «Տրամաբանական հարց կարող է առաջանալ, որ Արտաշես Չիչոյանը Խաչիկի աներորդին է, մանկության ընկերը, ավելին՝ այնքան մտերիմ են, որ Արտաշեսի մեքենան վերցրել ու հարսանիք է գնացել, եւ այսքանից հետո ինչպե՞ս կարող է նա էլ մասնակցություն չունենալ ծեծկռտուքին: Այս եւ այլ բոլոր վիճահարույց հարցերի պատասխանը կտա նախաքննությունը: Տեխնոլոգիաների դարում ենք ապրում, հիմա որեւէ բան թաքցնել հնարավոր չէ եւ շուտ թե ուշ ամեն բան բացահայտվելու է»:
Փաստաբանը նաեւ հավելեց, որ մահվան ելքով ծեծկռտուքի մասնակիցները արագ հեռացել են դեպքի վայրից, ինչի մասին վկայել է նաեւ սպանվածի մայրը: Իսկ դեպքից հետո Խաչիկ Կոսյանը նույնիսկ չի տեսել եւ որեւէ կոնտակտ չի ունեցել սպանության մեջ կասկածվողների՝ Արտաշես Չիչոյանի եւ Արարատ Նիկողոսյանի հետ: Մեր զրուցակիցը նաեւ ուշադրություն հրավիրեց այն հանգամանքի վրա, որ դատարանը ակնհայտ օրենքի խախտում է թույլ տվել՝ առանց խորհրդակցական սենյակ մտնելու իր պաշտպանյանի նկատմամբ որպես խափանման միջոց ընտրելով կալանքը:
«Նույնիսկ երբ հանցագործի ձեռքին բռնում են հանցագործության գործիքը, այնուամենայնիվ, նրան մինչեւ հանցանքի մեջ մեղադրելը համապատասխան իրավական գործընթաց են ծավալում: Բայց այս դեպքում, երբ մարդուն ծանրագույն մեղադրանք է առաջադրվում, դատարանն ինչ որ մարդկանց կրքերին հագուրդ տալու համար իրեն պահում է այնպես, կարծես համոզված է, որ սպանություն կատարողը հենց Խաչիկ Կոսյանն է: Սա օրենքի կոպիտ խախտում է, ինչը մտորելու տեղի է տալիս»,- ասաց Քոսյանը, սակայն չմանրամասնեց, ինչ մտորումների մասին է խոսքը: Նա նշեց նաեւ, որ դատավորը, ով կալանքի սանկցիա է տվել, եղել է նոր նշանակված՝ խոսքը Ա. Դանիբեկյանի մասին է:
Խաչիկ Կոսյանի մասով քրեական գործն այժմ Հատուկ քննչական ծառայության վարույթում է, քանի որ վերջինս ուժային կառույցի՝ ԴԱՀԿ աշխատակից է: Նա այժմ գտնվում է «Վարդաշեն» ՔԿՀ-ում:
Խաչիկն է խփել ու գետնին տապալել ամուսնուս:
Մենք զրուցեցինք նաեւ տիկին Մեյթիխանյանի հետ, ով միջադեպի մասին տրամագծորեն այլ մանրամասներ հաղորդեց: Նա ոչ միայն կրկնեց իր սկեսրոջ ասածը, այլ նաեւ պնդեց, թե «աշխարհն էլ որ քանդվի, մեկ է՝ Խաչիկը մեղավոր է»:
«Իմ 75 տարեկան սկեսուրին իր որդու՝ամուսնուս դիակի վրայից հոգեհանգստի օրը հանել, տարել են ճանաչման: Մտել է համապատասխան սենյակ ու անմիջապես ասել է՝ դո՜ւ էիր՝ ցույց տալով դրան (Խաչիկին-խմբ.): Մի պահ, սակայն, տարակուսել է, մեկ ուրիշին է ցույց տվել, ասել է՝ բայց կարող է՞ նա էր, բայց հետո ցուցմունքով հաստատել է, ասել է, որ չէ՜, հենցն առաջինը, ում որ ես ցույց եմ տվել, նա էր: Այնպես որ դա աներկբա է, իմ սկեսուրը չէր կարող սխալվել: Նա իր ցուցմունքով պնդել է, որ իր տղայի գլխին խփողը եղել է հենց Խաչիկ Կոսյանը»,-ասաց Մեյթիխանյանը: Նկատեցիք, թե Կոսյանը հենց դեպքի օրը գնացել է ոստիկանություն, նրա հագուստը ուղարկվել է համապատասխան փորձաքննության, եւ ըստ նրա փաստաբանի, եթե Կոսյանը ծեծկռտուքին մասնակցած լինի, ապա հագուստի վրա հետքեր մնացած կլինեն:
Սպանվածի այրին նկատեց, որ «էդ լակոտները եղել եմ հարբած, դեպքից հետո փախել են տուն եւ նրանց համար դժվար չէր լինի զգեստափոխվել, լողանալ ու նոր գնալ ոստիկանություն»: Մեթիխանյանը հակադարձեց փաստաբան Քոսյանի այն պնդմանը, թե Խաչիկը եղել է ավտոտեխսպասարկման կայանում եւ ծեծկռտուքին չի մասնակցել. «Այսինքն, տեսել է, որ իր աներձագը կռիվ է անում ու ինքը ձեռքերը գրպանը դրած երկու մետր հեռու է կանգնո՞ւմ: Ո՞ր մեկը կհավատա էդ հեքիաթներին:
Ես այսօր իմ ամուսնու յոթն եմ տվել, ու ամեն ինչ պա~րզ, կինոժապավենի նման իմ աչքերի առաջ երեւում է: Իմ սկեսուրն առաջինն ի՜նձ է պատմել իր տեսածը: Իմ ամուսինն ուժեղ էր, եւ կարողացել է իր վրա հարձակված երեք հոգու հետ կռիվ տալ: Երբ սկեսուրս ծղրտացել է՝ օգնեք, շրջվել է, տեսել է, որ սերվիսի կողմից երեք հոգի թափով մոտենում են: Ու իր մոտ ֆիքսվել է Խաչիկի դեմքը, քանի որ իրեն թվացել է, որ գալիս են օգնելու: Սակայն Խաչիկը եկել, հրել է սկեսրոջս ու ասել՝ էս ու՞մ ախպորն եք խփում: Ասում է՝ ինձ գցեց ու երկաթով, ինչ որ բութ բանով խփեց տղայիս գլխին ու նա ընկավ: Իսկ Խաչիկի կողքինը եղել է բոյով մեկը:
Սկեսուրս ասում է՝ Կարեն անուն է լսել ծեծկռտուքի ժամանակ, ու ասում է՝ վեց հոգին էլ հարվածում էին: Ես մի քանի անգամ հարցրել եմ, մա՜մ, էդ տղաներից գոնե մեկը չէր բաժանու՞մ, ասում է՝ ո~չ, բոլորն էլ խփում էին, ասում է՝ իմ տղան անշնչացած էր, արդեն չէր շարժվում, բայց նրանք էլի խփում էին: Ու երբ հասկացել են, որ էլ չի շնչում իմ ամուսինը, նույն րոպեին բոլորն անհետացել են, փախել են»:
Ո՞վ է Կարենը:
Տիկին Մեյթիխանյանը անդրադարձավ նաեւ Խաչիկի հոր՝ Հակոբ Կոսյանի՝ «Հրապարակին» տված հարցազրույցի այն հատվածին, որտեղ վերջինս ասում է, թե որդին դեպքից հետո եկել է տուն, պատմել իրեն, որ նման միջադեպ է եղել, միասին իջել են բակ, զրուցել…: «Ինչի Խաչիկն էդքան միամիտ, երկրի կյանքից կտրված տղա՞ էր ու չգիտե՞ր, որ իր աներձագը նման կռվի է մասնակցել: Իրեն չէին ասե՞լ, որ մարդ են խփել, սպանել: Ո՞ր մի միամիտը կհավատա դրանց հեքիաթներին: Իմ ամուսինն էնքան շատ էր սիրում ասել «Գյուլնազ տատի հեքիաթ» արտահայտությունը, երբ մեկը չտրամաբանված բան էր խոսում: Ինձ համար այդ սպանությունը սկզբից մինչեւ վերջ, դետալ առ դետալ պարզ է:
Իմ սկեսուրը ճանաչել է Խաչիկին, իսկ Արտաշես Չիչոյանին, ով մյուսների հետ թռել է ամուսնուս դեմքին, որ հարվածի, ու հենց էդտեղից էլ սկսել է ծեծկռտուքը, իմ սկեսուրն ասել է՝ ես քո դեմքը հիշելու եմ, ես քո դեմքը չե~մ մոռանալու:
Հենց նրա նկարը ցույց տվեցինք, սկեսուրս ասաց, որ հենց ինքն է առաջինը թռել, որ ամուսնուս հարվածի: Էնպես որ, աշխարհ էլ որ քանդվի, իմ սկեսուրն իր ցուցմունքը չի փոխի եւ անմեղ մարդու վրա սուտ վկայություն չի տա: Նա ուժեղ, առողջ տղա ուներ, որը 25 հոգու կծեծեր, կսատկացներ, եթե իր գլխին չխփեին ու վեց հոգով չհարձակվեին իր վրա»:
Նշենք նաեւ, որ սպանված Եղիշե Խաչատրյանն ու սպանության մեջ մեղադրվողները բնակվում են նույն վայրում՝ Էրեբունի վարչական շրջանում՝ Արեշում:
Հեղինե Մանուկյան
Այս նյութը դիտել են - 3682 անգամ