2016-07-01 23:48:00
Միացյալ Նահանգների օգնության ծավալը Հայաստանին կարող է աճել: Այս մասին է վկայում Սենատի հատկացումների հանձնաժողովի որոշումը, որի համաձայն սենատորներն առաջարկում են Հայաստանին հատկացնել 24 միլիոն դոլարի օգնություն, որը 10 տոկոսով ավելին է գործադրի կողմից առաջարկվող օգնության ծավալներից: Վաշինգտոնի հայ դատի հանձնախմբի գործադիր տնօրեն Արամ Համբարյանի խոսքով, սենատորների որոշումը ողջունելի է.
«Հաջորդ շաբաթներին մենք ակնկալում ենք սերտ աշխատել Ներկայացուցիչների պալատի եւ Սենատի մեր բարեկամների հետ՝ այս նախաձեռնություններն առաջ տանելու ուղղությամբ»:
VOA-ի փոխանցմամբ, Առաջին անգամ օգնությունն առանձին տողով ներառելու է նաեւ Սիրիայից եւ Իրաքից հայաստան գաղթաց փախստականներին, նշում է Համբարյանը:
Ամերիկայի հայկական համագումարի գործադիր տնօրեն Բրայըն Արդունիի խոսքով, Միացյալ Նահանգներին անհրաժեշտ է օգնել Հայաստանին կարգավորել Մերձավոր Արեւելքից ժամանած հայ փախստականների վիճակը.
«Հայաստանը պետք է խրախուսվի Սիրիայից եւ Իրաքից փախստականներ ընդունելու համար: Զեկույցների համաձայն, Հայաստանը մեկ շնչի հաշվով ամենաշատ փախստականներ ընդունած երրորդ երկիրն է, այնպես որ, անհրաժեշտ է թեթեւացնել այդ ծանր բեռը»:
Մեկ այլ կարեւոր ուղղություն, որը նույնպես առանձին հատկացումներ է նախատեսում, ԱՄՆ-ի օգնությունն է Լեռնային Ղարաբաղի բնակչությանը: Արամ Համբարյանի խոսքով, սա կարեւոր ազդանշան է.
«Մեր աշխատանքը հիմնականում կենտրոնացած էր Միացյալ Նահանգների կողմից Լեռնային Ղարաբաղին օգնության հատկացման վրա: Ղարաբաղում կան երիտասարդներ, մեծահասակներ, որոնք ծանր վիճակում են գտնվում եւ ռեաբիլիտացիոն բնույթի օգնության կարիքն ունեն»:
Բրայըն Արդունիի խոսքով՝ հանձնաժողովի որոշումը կարեւոր է ոչ միայն Ղարաբաղին օգնություն հատկացնելու այլեւ՝ հակամարտությունը խաղաղ լուծելու տեսանկյունից.
«Հանձնաժողովը մասնավորապես կարեւորել է ղարաբաղյան հակամարտության խաղաղ կարգավորման գործընթացը, ինչը մեր կարծիքով կրկին բացահայտում է շփման գծում հատուկ սարքավորումների տեղադրման կարեւորությունը»:
Միացյալ Նահանգների արտաքին հատկացումների վերաբերյալ առանձին որոշում է ընդունելու նաեւ Ներկայացուցիչների պալատի հատկացումների հանձնաժողովը, որից հետո Սենատը եւ Կոնգրեսի ստորին պալատը միասին շտկելու են երկու որոշումների միջեւ եղած հակասությունները՝ վերջնական օրենքն ընդունելուց առաջ:
Այս նյութը դիտել են - 1508 անգամ