2016-07-19 03:03:00
«Քաղակտիվիստների բերման ենթարկումը Երեւանում զինված հարձակումից հետո. իրավական գնահատականներ» թեմայով քննարկման ժամանակ «Իրազեկ քաղաքացիների միավորում» ՀԿ նախագահ Դանիել Իոաննիսյանը հայտարարեց, որ երեկ բերման ենթարկված քաղաքացիներին ոչ միայն ծեծի են ենթարկել, այլ նաեւ ստորացրել:
Հիշեցնենք, որ երեկ Ազատության հրապարակից բերման ենթարկվեցին տասնյակ քաղաքացիներ, այդ թվում քաղաքացիական ակտիվիստներ Դավիթ Սանասարյանը, Լեւոն Զաքարյանը եւ Արտուշ Չիբուխչյանը, որոնց ոստիկանանական ծեծից հետո տեղափոխել էին հիվանդանոց:
Իոնաննիսյանի խոսքով՝ բերման ենթարկված ակտիվիստներին տեղափոխել են ոստիկանության ներքին զորքերի Դավիթաշենի բաժին.
«Զորամասում կոնցլագերային պայմաններ են եղել, բոլորին տարել, լցրել են մի դահլիճի մեջ, ռազմագերու կարգավիճակով պահել են, իսկ ում հետ հին հաշիվներ են ունեցել, դուրս են հանել դահլիճից՝ դրսում ծեծի ենթարկել: Դավիթ Սանասարյանի ու մի քանի երիտասարդի նկատմամբ խոշտանգման երեւի ամենավերին աստիճանն է եղել, այդ ծեծի հետեւանքով Սանասարյանը ոչ միայն ուղեղի ցնցում է ստացել, այլ նաեւ՝ ստորացում: Ստիպել են, որ տղաները համբուրեն ոստիկանների կոշիկները, թքել են տղաների վրա, դե հայհոյանքների տեղատարափի մասին խոսելն անիմաստ է»,-ասաց նա:
Իոաննիսյանի ներկայացմամբ՝ Սանասարյանին մինչ զորամաս հասցնելը ողջ ճանապարհին ծեծի են ենթարկել այն աստիճան, որ գիտակցությունը կորցրել է. ուշքի է եկել ջրի շփոցից:
«Տղաների խոսքով ոստիկաններից մեկը նման բան է ասել՝ ձեր լավ ժամանակները պրծան, հին ժամանակները եկան, ու սրանից հետո սենց է լինելու»,-ասաց Իոաննիսյանը՝ համոզմունք հայտնելով, որ ոստիկաններին համակարգից է նման հրահանգ տրված:
Այս նյութը դիտել են - 5984 անգամ