2016-07-20 13:28:00
Պատգամավորներ Հրանտ Բագրատյանն ու Խաչատուր Քոքոբելյանն անհարմար իրավիճակի մեջ են հայտնվել: Եվ այդ վիճակի մեջ նրանց գցել է կառավարությունը, թեև վերջինս այն կարծիքին է, որ մինչ իր գցելը՝ պատգամավորներն արդեն ընկած էին: Բանն այն է, որ հայ-ռուսական հակաօդային համաձայնագրի կնքումից հետո նշված երկու օրենսդիրները ներկայացրել էին Հայաստանի Հանրապետության օդային օրենսգրքի նոր նախագիծ, որով առաջարկվում էր նորովի կարգավորել ավիացիայի ոլորտն ու փոխել օդային քաղաքականությունը:
Ինչ խոսք, այլ մոտեցում դրսևորելու մեջ որևէ վատ բան չկա: Բայց երբ նրանց նախագիծն ընթերցեցին գործադիրում, անմիջապես հասկացան, որ եղածը բոլորովին բանի նման չէ: Ու հարցը միայն այն չէր, որ փաստաթուղթն իրավական կարգավորման առումով թերի էր:
Մի բան էլ կար, ինչն անհնար էր չնկատել: Կառավարությունն անմիջապես հասկացավ, որ Բագրատյանն ու Քոքոբելյանն իրենց ծանր գործը թեթևացնելու համար որոշել էին անցնել կարճ ճանապարհով ու փաստացի զբաղվել էին... գրագողությամբ: Գործադիրն իր հիմնավորման մեջ այդ մասին ակնարկել է այսպես. «Հարկ է նշել, որ ներկայացված նախագծի դրույթները կարծես օտարալեզու նյութի թարգմանության արդյունք են և չեն համապատասխանում հայոց լեզվի շարադասության կանոններին, հետևապես, բովանդակային առումով անհասկանալի են: Բացի այդ, նախագծով նախատեսված հարաբերությունների կարգավորումը շատ խճճված է ու խրթին»:
Հիմա Բագրատյանն ու Քոքոբելյանը կարող են գոհ լինել Աստծուց, որ իրենց նախագիծը հավանության չարժանացավ, այլապես հետո ստիպված էին լինելու երկար-բարակ բացատրություններ տալ այն երկրների օրենսդիրներին, որոնց աշխատանքը կամ, ինչպես ասում են, հեղինակային իրավունքը յուրացրել են: