ՀՀ ոստիկանության մամուլի ծառայությունից տեղեկանում ենք, որ հուլիսի 19-ին Երևանի Խորենացի փողոցում և հուլիսի 29-ի լույս 30-ի գիշերը Սարի թաղում տեղի ունեցած դեպքերի առիթով կարգապահական պատասխանատվության են ենթարկվել ոստիկանության մի շարք ծառայողներ, այդ թվում՝ Երևանի ոստիկանապետ Աշոտ Կարապետյանը: Իրավապաշտպան Ժաննա Ալեքսանյանը, «Առաջին մարդը, ում պետք էր հեռացնել աշխատանքից, ոստիկանապետն էր, ով կազմակերպել և իրականացրել էր այդ ամբողջ օպերացիան Սարի թաղում և պարբերաբար այդ ծեծուջարդն ակտիվիստների նկատմամբ: Ինչ վերաբերում է ոստիկանության նկատողություններին և կասեցումներին, դա ուղղակի ծիծաղելի է այս իրադարձությունների ֆոնին»:
«Լրագրողներ հանուն մարդու իրավունքների» ՀԿ նախագահ, իրավապաշտպան Ժաննա Ալեքսանյանի կարծիքով չնայած որ գլխավոր դատախազ Գևորգ Կոստանյանի հրաժարականի պաշտոնական հիմնավորումն այլ էր, բայց և այնպես հրաժարականի հիմնական պատճառն այս դեպքերով է պայմանավորված.
«Քննությանը վերահսկող մարմինն է, և հնարավոր է, որ շատ բաների հետ չի համաձայնել Կոստանյանը, վերջին հաշվով մարդը չի կարող մինչև վերջ խրվել այս ամենի մեջ, հեղինակության հարց կա, երիտասարդ կադր է»:
Իրավապաշտպանը պնդում է՝ անկախ նրանից, որ Վլադիմիր Գասպարյանն ու ոստիկանական ողջ համակարգը կատարել են Սերժ Սարգսյանի հրահանգը, դե յուրե պատասխանատուն մնում է ոստիկանապետը, իսկ ոստիկանության այդ օրերի գործողություններն առնվազն տասնյակ տարիներով հետ մղեցին ՀՀ-ին ժողովրդավարական, իրավական պետություն դառնալու ճանապարհից.
«Սա ամբողջական պատկերն է, թե իրականում ոստիկանությունն ինչով է ՀՀ-ում զբաղվում, և երևում է միայն ՀՀԿ-ն է տեսնում բարեփոխումները, և ոչ ոք այլևս չի տեսնում, որովհետև երկու օր առաջ Հերմինե Նաղդալյանը հայտարարեց, որ ոստիկանությունը բարեփոխված է, և ով աչք ունի, թող տեսնի»:
Նաիրա Նալբանդյան