2016-08-16 01:01:00
Նրանց սիրում են եւ ատում, տարածում եւ արգելում. Հայտնի Pokemon Go խաղը եզակիներին է թողնում անտարբեր: Ուոթերթաունի Ամերիկայի հայկական թանգարանը գտել է pokemon-ների, կամ, հայերեն ասած՝ գրպանային հրեշների խնդրի լուծման բանալին:
Pokemon Go խաղը, որի նպատակն է գտնել, հեռախոսի տեսախցիկի օգնությամբ բռնել եւ վարժեցնել աշխարհագրական պատահական վայրում գտնվող փոքրիկ հրեշներին, մեծ տարածում է գտել աշխարհովում: Pokemon-ներին բռնում են Սպիտակ տանը, Եգիպտոսի բուրգերի վրա եւ նույնիսկ պատերազմի մեջ գտնվող Սիրիայի քաղաքների փողոցներում:
Սակայն խնդիրն այն է, որ Pokemon-ները կարող են գտնվել նաեւ ավտոճանապարհի վրա կամ վտանգավոր այլ վայրերում։ Այդ դեպքում մոլեռանդ խաղացողները հաճախ մոռանում են անվտանգության մասին: Ուստի, որոշ հաստատություններ ու նույնիսկ որոշ պետությունների կառավարություններ փորձում են արգելել այդ խաղն իրենց տարածքում:
ԱՄՆ-ի Մասաչուսեթս նահանգի Ուոթերթաուն քաղաքում գտնվող Ամերիկայի հայկական թանգարանը որոշել է խնդրին մոտենալ այլ կերպ: Թանգարանը հայտնի է իր եզակի հավաքածուներով եւ այստեղ անցկացվող գիտաժողովներով: Այստեղ է Հայաստանի սահմաններից դուրս գտնվող հայ մշակույթի եւ ձեռագրերի ամենահարուստ հավաքածուներից մեկը:
Սակայն, երիտասարդ սերունդը հաճախ նախընտրում է թանգարան այցելելու փոխարեն խորասուզվել հեռախոսի մեջ: Ելքը մեկն է՝ միավորել այդ երկուսը: Այսպիսով, Ամերիկայի հայկական թանգարանը գաղտնի Pokemon-ներ է տեղադրել թանգարանի տարածքում, որոնց անհրաժեշտ է որսալ: Դրանց գտնվելու վայրը երիտասարդ այցելուները կարող են բացահայտել միայն թանգարանում ցուցադրված որոշ արվեստի գործերի հետ ծանոթանալուց հետո:
Դե, իսկ նա, ով բացահայտի թանգարանի բոլոր գաղտնիքները եւ որսա թանգարանում թաքնված բոլոր տասը Pokemon-ներին, ստանում է հատուկ մրցանակ՝ ոչ թե էլէկտրոնային այլ՝ իրական փոքրիկ հրեշ:
Այս նյութը դիտել են - 3221 անգամ