Հայ-էկվադորական նոր համագործակցություն՝ մարդու իրավունքների պաշտպանության ոլորտում. լուսանկարներ
2016-08-30 02:20:00
2016-08-30 02:20:00
«Հայ-էկվադորական բարեկամություն» ՀԿ նախագահ Վարդան Հարությունյանը Էկվադորում հանդիպել է երկրի Մարդու իրավունքների պաշտպան Ռամիրո Ռիվանդենեիրա Սիլվայի հետ:
Հանդիպման սկզբում Վարդան Հարությունյանը ներկայացրեց իր ղեկավարած կազմակերպությունը, նրա գործունեությունը՝ կենտրոնանալով հատկապես Հայաստանում գտնվող էկվադորցիների իրավունքների պաշտպանության վրա:
Ռամիրո Ռիվանդենեիրան նշեց, որ տեղյակ է կազմակերպության մասին՝ ընդգծելով, որ միշտ մարդն է կարևոր՝ անկախ ռասսայից և ազգությունից: Էկվադորի ՄԻՊ-ը շնորհակալություն հայտնեց կատարված աշխատանքի և Էկվադորի քաղաքացիներին ցուցաբերված աջակցության համար:
Վարդան Հարությունյանը Ռամիրո Ռիվանդենեիրային ներկայացրեց նաև Էկվադորում բնակվող Հայաստանի քաղաքացիների խնդիրները՝ միջնորդելով, որ վերջինս հնարավորինս աջակցի նրանց, քանի որ երկու երկրները չունեն դեսպանատներ, ինչը խոչընդոտներ է ստեղծում մարդկանց համար:
Քննարկման արդյունքում որոշվեց, որ հետայսու ևս Ռամիրո Ռիվանդենեիրայի ղեկավարած կազմակերպությունը Էկվադորում կպաշտպանի ՀՀ քաղաքացիների շահերը, իսկ «Հայ-էկվադորական բարեկամություն» ՀԿ-ն՝ Հայաստանում էկվադորցիների շահերը: Երկու կազմակերպությունների միջև տորագրվեց համագործակցության համաձայնագիր:
Հանդիպման ավարտին կողմերը դատապարտեցին աշխարհում տեղի ունեցող ցեղասպանությունները: Վ. Հարությունյանը Ռ. Ռիվանդենեիրային ապրիլի 24-ին հրավիրեց Հայաստան, Էկվադորի ՄԻՊ-ը հրավերն ընդունեց:
