2016-09-15 23:41:00
Վերջապե՛ս: Անցավ ընդամենը 8 տարի և Սերժ Սարգսյանի գլխավորած իշխանությունը բարձրաձայնեց երկրի տնտեսության ծանր վիճակի մասին: Տեղ հասավ. Ինչպես ասում են, լավ է ուշ, քան ավելի ուշ: Ի՞նչ ասես, իրենց շուրջը տիրող աղետալի վիճակը տեսնելու համար նրանցից պահանջվեց ընդամենը 8 տարի և արտերկրում աշխատող մասնագետ, որ ուշադրություն դարձնի այն ծանրագույն խնդիրներին, որոնց բոլորս ամենօր ենք բախվում և որոնց քաջատեղյակ ենք:
Դա մենք: Իսկ Սերժ Սարգսյանը երևի այլ իրականություն էր տեսնում: Իրականություն, որտեղ աղքատ ժողովուրդը կարողանում էր ինչ-որ տեղից գումար հայթայթել ոչ միայն սեփական չքավոր գոյությունը պահպանելու, այլև այդ միջոցներից մի բան էլ կտրում էր՝ Սերժ Սարգսյանի ու նրա մտերիմների շքեղ և անհոգ կյանքը ապահովելու համար: Շատ էլ, որ բողոքում են, ասում են փող չկա, Սերժ Սարգսյանը այդ բողոքներին չի հավատում ու տարեցտարի ավելացնում է հարկային բեռը՝ կյանքն էլ ավելի անտանելի դարձնելով:
Հիմա վերջապես հասկացել են, որ այլևս թալանելու բան չկա և շուտով իրենք էլ են ստիպված լինելու զսպել իրենց անսահման ագահությունը: Ու դրա համար էլ երևի Կարեն Կարապետյանին են հրավիրել, որ նա մահամերձ տնտեսությունը ռեանիմացնի:
Վերջապես հասկացել են, որ այդ փողը, որ ժողովրդից քերթում էին, օդից չի գալիս, որ գումար հնարավոր չէ ստանալ միայն հարկեր հավաքելով, այդ հարկերը պետք է վճարող լինի, վճարողն էլ ինչ-որ կերպով պետք է կարողանա բարիք ստեղծել, որի դիմաց գումար կստանա, դրա մի մասն էլ կտա ձեզ, որ գնաք Մոնակոյում ու Մակաոյում զվարճանաք, պետբյուջեի հաշվին «լավ ախպերների» կնունք-ծնունդ-հարսանիքներին մասնակցեք, բյուջեի հաշվին նախագահի ինքնաթիռով քեֆերի գնաք Մոսկվա ու եսիմ ուր:
Սերժ Սարգսյանին ընդամենը 8 տարի պահանջվեց հասկանալու համար, որ չաշխատած փող չի լինում և եթե նա նույնիսկ այդ փողը գողանում է ժողովրդից, ժողովուրդը այդ փողը նախ պետք է աշխատի: Հայաստանի քաղաքացիները ամեն մեկը իրենց հայաթներում փոքրիկ Հայաստաններ չունեն, որ իրենք էլ անվերջ հարկեր բարձրացնեն, իրենց ժողովրդից փող քերեն բերեն տան Սերժ Սարգսյանին:
Կարծում եմ Կարեն Կարապետյանի կախարդական փայտիկի մասին խոսքն ուղղված էր ավելի շատ հենց Սերժ Սարգսյանին. իսկապես, 8 տարի երկիրը թալանեցին, կործանեցին տնտեսությունը, հիմա էլ ընտրություններից 6 ամիս առաջ Կարեն Կարապետյանին կանչել են, թե բա մի բան արա:
Հրանտ Ենոքյանի ՖԲ էջից