2015-12-28 10:26:00
Ջհանգիր Լֆիկյան
Երևանի քաղաքապետարանը միշտ աչքի է ընկնում աշխատակիցների բարձր ինտելեկտուալությամբ և բարոյականությամբ: Քաղաքապետարանի ղեկավարի ինտելեկտը հատել է բոլոր սահմանները՝ նրան աշխարհահռչակ գիտնականի կոչում ապահովելով: Մի կողմ դնենք այն հանգամանքը, թե ինչ գիտություն է նա ուսումնասիրում, դրա մասին ոչ ոք չգիտի, նա գիտնական է և վե՛րջ: Տարոնն իր նման գիտնականների և ինտելեկտուալների թիմ է ստեղծել:
Նրանք բոլորն էլ աշխատում են և իրենց վաստակն են ներդնում ի նպաստ մեր քաղաքի: Տարոնի, ՃՔՎ-ի Անդոյի մասին մենք գրել ենք, մնում են մյուսները: Դրանցից մեկն էլ Արման Եդոյանն է: Նրա ինտելեկտը լիովին զիջում է Տարոնի ինտելեկտին, սակայն դա այդքան էլ կարևոր չէ. նա շատ ինտելեկտուալ է և հենց այդ պատճառով էլ զբաղեցնում է Երևանի քաղաքապետարանի առևտրի և սպասարկումների վարչության պետի պաշտոնը: Արման Եդոյանը հասարակությանը հայտնի դարձավ իր աննկարագրելի ինտելեկտուալ գործերով: Օրինակ՝ 2013թ. հուլիսի 17-ին Հանրապետության հրապարակում ծեծի էր ենթարկել փուչիկ վաճառող 25-ամյա Արսեն Սաքանյանին: Փաստի առնչությամբ ոստիկանության Կենտրոնի բաժնում նյութեր էին նախապատրաստվում, սակայն քրեական գործ չէր հարուցվել հանցակազմի բացակայությամբ, և դա՝ այն դեպքում, երբ Արման Եդոյանի հարվածներից հետո 25-ամյա Արսենն ուշաթափվել էր և նրան տեղափոխել էին «Էրեբունի» բժշկական կենտրոն: Հայրենի ոստիկանությունը հանցակազմ չհայտնաբերեց նաև, երբ 2015թ. սեպտեմբերի 13-ին, ժամը 22:20-ի սահմաններում, Lexus մակնիշի 11 RR 111 համարանիշի ավտոմեքենայի վարորդ, Երևանի քաղաքապետարանի առևտրի վարչության պետ, 39-ամյա Արման Եդոյանը Ռուբինյանց փողոցի թիվ 20 շենքի դիմաց վրաերթի ենթարկեց նույն փողոցի բնակիչ, 53-ամյա Խորեն Մկրտչյանին, որը մոտ 28 մետր շպրտվեց և տեղում մահացավ: Չնայած այն հանգամանքին, որ հարուցված քրգործով քաղաքապետարանի վարչության պետին, երթևեկության կանոնները խախտելու և անզգուշությամբ մարդու մահ առաջացնելու համար, սպառնում էր առավելագույնը 5 տարի պատժաժամկետ, նաև՝ որոշակի պաշտոններ զբաղեցնելու իրավունքից զրկում՝ մինչև 3 տարի ժամկետով, Արման Եդոյանը ոչ միայն չձերբակալվեց, այլև շարունակեց պաշտոնավարել: Դե, մահացածն էլ ի՞նչ՝ մահացավ և վե՛րջ: Խնդիրն այն է, որ Հայաստանում շատ է հարգված ինտելեկտը, և ինտելեկտուալ մարդկանց ամեն ինչ ներում են հանուն Հայաստանի ինտելեկտուալ ապագայի:
Հանրաճանաչ գիտնականներ Լիսկայի որդու և Տարոնի, պետական գործիչ Շմայս բռնաբարի, Աստծո նվիրյալ Գարեգին Բ-ի գործած մեղքերը ներվում են հենց նրանց ինտելեկտուալ լինելու համար: Նրանք պետք են հայրենիքին, այնպես, ինչպես Տարոնի Արման Եդոյանը, որին, հաշվի առնելով նրա բացառիկ հնարավորությունները, Տարոնը շատ կարևոր հանձնարարություն է տվել: Այսուհետ փուչիկ վաճառողներին ծեծող և մարդասպան ինտելեկտուալը պետք է հայ երեխաների համար Ձմեռ պապեր ընտրի: Ըստ Տարոնի հանձնարարության, մեր նյութի հերոսը պետք է ուսումնասիրի Երևանի փողոցներում Ձմեռ պապ ներկայանալ ցանկացողներին և որոշի նրանց համապատասխանությունն այդ կերպարին: Դա նշանակում է, որ Նոր տարվա փողոցային արարողություններին Ձմեռ պապ լինելու հավաստագիր են ստանալու Արման Եդոյանի նմանները: Այս պարագայում խորհուրդ չենք տալիս ձեզ երեխաներին տանել քաղաքապետարանի կազմակերպած միջոցառումներին, առավելևս՝ շփվել Ձմեռ պապերի և Ձյունանուշների հետ, քանզի ամեն ինչ կարող է պատահել՝ ծեծուջարդ, վրաերթ, դե՛, Ձյունանուշների դեպքում էլ՝ հազար ու մի վարակ: