Երեկ Արմավիրի մարզի ջրառատ համայնքի ընտրություններում վերընտրվեց գործող գյուղապետը՝ Հայաստանի փոխոստիկանապետ Լևոն Երանոսյանի քրոջ որդին՝ Սամվել Գալստյանը: Ընտրությունների ողջ ընթացքում Երանոսյանի որդին իր շքախմբով գտնվում էր ընտրատեղամասերի շրջակայքում՝ ընդհուպ մուտք գործելով օրենքով արգելված գոտիներ:
Նշենք, որ ընտրատեղամասերից մեկում վստահված անձինք և դիտորդները հայտնաբերել էին դատարկ ծրարներ և արձանագրել կարուսելի դեպքեր: Իսկ ձայների հաշվարկից հետո, երբ պարզ է դարձել, որ գործող գյուղապետը վերընտրվել է, ընտրատեղամասերից դուրս լարվածություն է առաջացել երկրորդ տեղում հայտնված թեկնածուի կողմնակիցների և գործող գյուղապետի համախոհների միջև: Կարճ ժամանակ անց այստեղ են բերվել ոստիկանության զորքեր, որոնք ցրել են հավաքված բազմությանը:
Հավաքվածները բողոքում էին, որ գեներալը նորից զորքը հանեց ժողովրդի դեմ:
Փաստորեն, Լևոն Երանոսյանը ոստիկանության զորքերն ազատորեն օգտագործում է ազգականների իշխանությունը պահելու համար: