2016-01-01 04:25:00
Արդարադատության նախկին նախարար Հովհաննես Մանուկյանը հունվարի 1-ին Ձմեռ պապիկի հագուստով շրջելու է Գյումրիի վագոն-տնակներում:
NEWS.am-ի թղթակցի հետ զրույցում Մանուկյանն ամփոփել է 2015թ.-ն եւ անդրադարձել գալիք տարվա անելիքներին:
Պարոն Մանուկյան, 2015թ. Ձմեռ պապիկից խնդրել էիք Ղարաբաղյան հարցի վերջնական լուծում: Ձմեռ պապն ինչքանո՞վ իրականություն դարձրեց Ձեր երազանքը:
Ցավոք, անցնող տարում այս հարցում դրական տեղաշարժեր չեղան, հակառակը տարին սկսվեց եւ ավարտվում է սահմանների լարվածությամբ, դիպուկահարների ակտիվությամբ: Իհարկե, մեր համարժեք պատասխանը երբեք չի ուշանում: Հիշենք թեկուզ հայ դիպուկահարուհու դեպքը, որը մեծ հիստերիա առաջացրեց Ադրբեջանում: Ընդ որում հիմնականում նրանց կողմի գրեթե բոլոր դիպուկահարները վարձկաններ են: Մեր աղջկա գնդակից խոցվելը կրկնակի ամոթ էր իրենց համար, քանի որ ինչպես հայտնի է կնոջ ձեռքով սպանված տղամարդը նրանց կրոնի համաձայն դրախտ չի ընկնում: Իհարկե, Ղարաբաղի հարցում դրականն այն էր, որ այնուամենայնիվ լայնամասշտաբ պատերազմից խուսափել եւ խուսափում ենք մինչ օրս: Ինչպես ասում են «Любой плохой мир гораздо лучше, чем любая война»: Ես լավատես եմ եւ չեմ կորցնում լավատեսությունս Մինսկի խմբի ձեւաչափով խաղաղ հանգուցալուծում գտնելու հարցում:
2016թ.-ի համար ի՞նչ է ցանկացել Ձեր որդին՝ 7-ամյա Ալեքսանդրը, որը Ձմեռ պապն անպայման իրականություն է դարձնելու:
Ալեքսանդրը բնավորությամբ ինձ նման է, փոքր-ինչ անհամբեր, ուստի Ձմեռ Պապիկին նամակներ սկսում է գրել դեռեւս ամռանից: Հետաքրքիր է, որ տարեցտարի նրա ցանկություններն ու երազանքները ավելի որոշակի են դառնում: Մարդը հստակ գիտի՝ ինչ է ուզում: Այս տարի շուտ գնեցի իր շատ երազած խաղը ու տղաս գոհունակությամբ ասաց, որ արդեն գոհ է եւ բավարարված Ձմեռ Պապիկից: Բայց ասեմ, որ չմոռացավ այնուամենայնիվ շնորհակալական նամակ գրել:
Կհիշե՞ք Ալեքսանդրի՝ Ձմեռ պապին ուղղված այն նամակը, որը Ձեզ պարզապես «խուճապի» մատնեց:
Ինչպես նոր ասացի, ինձ խուճապի մատնեց այս տարվա ցանկության բացակայությունը, մտածում եմ, որ առանց այդ «հուշաթերթիկի» Ձմեռ Պապիկին բավական դժվար կլինի կողմնորոշվել:
Կրտսեր Մանուկյանի երազանքները թերեւս կտարբերվեն Գյումրիում վագոն-տնակներում բնակվող երեխաների երազանքներից: Ինչքանո՞վ եք հավանական համարում, որ Ձմեռ պապն այս երեխաների երազանքն էլ իրականություն կդարձնի գոնե այս նոր տարում:
Յուրաքանչյուր երեխա արժանի է լավագույնին: Ցավոք դեռեւս հնարավոր չէ ստեղծել այնպիսի պայմաններ, որ նորմալ կենցաղը շատ երեխաների համար չդասվի անիրականանալի երազանքների շարքը: Ալեքսանդրի հետ շատ ենք այցելել անապահով երեխաների: Այդ շփումներից ես հասկացել եմ, որ երեխան մնում է երեխա՝ իր տարիքին բնորոշ ընդհանուր երազանքներով. մի մեքենա, մի տիկնիկ, համակարգիչ…Կարծում եմ մեզնից յուրաքանչյուրը պետք է կարողանա տարվա մեջ գոնե մեկ անգամ Ձմեռ Պապ դառնալ այն փոքրիկների համար, ովքեր անկախ իրենց կամքից լիարժեք մանկություն չունեն:
Գյումրիի վագոն-տնակների մասին հարցը պատահական չէր. արդարադատության նախարարի պաշտոնից ազատվելուց հետո առավել ակտիվ եք զբաղվում աղետի գոտու, մասնավորապես Գյումրու հարցով: Ի՞նչ սպասելիքներ ունեք այս տարի:
Շիրակի մարզը, եւ հատկապես Գյումրին ինձ շատ հարազատ են: Գիտեք՝ սպասելիք բառը այդքան էլ տեղին չէ, քանի որ սպասում ես ուրիշից: Գյումրիի պարագայում ես իրոք ուրիշից որեւէ բան ակնկալել կամ սպասել դրության լավացման, չեմ կարող: Իհարկե հասկանալի է, որ հնարավոր չէ երկրի ընդհանուր վիճակից անջատ Գյումրին զարգացնել: Հնարավոր չէ բարեկեցություն ապահովել առանձին վերցրած մարզում կամ քաղաքում: Դա երկրի ընդհանուր զարգացման համատեքստում պետք է դիտարկել: Սակայն նպաստել կոնկրետ տարածքում աշխատատեղերի բացմանը, բարձր տեխնոլոգիաների ներգրավմանը, ուսանողական եւ մշակութային կյանքի աշխուժացմանը մենք բոլորս պարտավոր ենք: Ես հնարավորության սահմաններում միշտ գյումրեցիների հետ եմ: Ի դեպ շատ վագոն-տնակների համար Ձմեռ Պապն այս նոր տարուն ես կլինեմ: Հիմնական շեշտը դնում ենք մարդկանց սոցիալական, առողջական խնդիրների թեթեւացման վրա: Ջերմ հարաբերությւոններ ունենք նաեւ ֆիզիկական առանձնահատկություններ ունեցող մարդկանց հետ:
2017թ.-ն վերջնական վերականգնված Գյումրիի մասին խոսելու համար ի՞նչ պետք է անեն ՀՀ իշխանությունները:
Իհարկե իշխանությունները, այդ թվում տեղական ինքնակառավարման մարմիններն աշխատում են խնդիրների թեթեւացման ուղղությամբ: Կարծում եմ, որ Գյումրիում հիմնական շեշտը պետք է դրվի աշխատատեղերի խնդրի լուծման վրա, գուցե պետք է քննարկել այս շրջանը հատուկ տնտեսական գոտու վերածելու խնդիրը, այս կերպ հնարավոր կլինի լուծել նաեւ շատ գյումրեցիների տունդարձի հարցը: Կարծում եմ՝ շատ կարեւոր է նաեւ տեղական իշխանության ակտիվությունը: Գյումրին ընտրությունների շեմին է եւ արդյունքներից կախված կլինի քաղաքի խնդիրների առավել արդյունավետ լուծումներ գտնելու հնարավորությունը:
Խնդիրների մասին մտածելով՝ չմոռանանք Նոր Տարվա մասին, շնորհավորում եմ բոլորի Ամանորը: Առողջ եղեք, նախաձեռնող եղեք ձեր գաղափարներն ու ծրագրերը ձեւակերպելիս, համարձակ եւ անկոտրում եղեք ձեր որոշումները կյանքի կոչելիս: Այդ դեպքում 2016-ը ձեզ կժպտա:
Այս նյութը դիտել են - 1629 անգամ