2016-10-11 09:26:00
Այն, ինչ կատարվեց երեկ Վանաձորում պարզապես խայտառակություն էր: Ընդդիմադիր ուժերը՝ ունենալով մեծամասնություն քաղաքի ավագանիում, նախապես ձեռք բերելով համաձայնություն՝ քաղաքապետի միասնական թեքնածուի շուրջ, չկարողացան Քրիստ Մարուքյանին քաղաքապետ ընտրել: Պատճառն էլ այն է, որ ավագանու 4 ընդդիմադիր անդամ իրենց ձայները տվեցին ՀՀԿ-ական Մամիկոն Ասլանյանին՝ խախտելով նախապես ձեռք բերված պայմանավորվածությունը:
Այստեղ հարց է առաջանում, արդյո՞ք ՀՀԿ-ն ճնշում է գործադրել այդ 4 իբր ընդդիմադիր գործիչների վրա, թե՞ գաղտնի համաձայնության է եկել ավագանի անցած ընդդիմադիր կուսակցություններից մեկի հետ: Եվ «Լուսավոր Հայաստանը», ՀՎԿ-ն ու ԲՀԿ-ն պետք է ամենինչ անեն՝ այս դավաճանությունը խաբեությունը բացահայտելու և հանրությանը ճշմարտությունը ներկայացնելու համար: Այլապես այս դեպքը մեծ վնաս կհասցնի նրանց՝ խորհրդարանական ընտրություններին ընդառաջ:
Իսկ բացահայտելու ձևերը շատ պարզ են: Ավագանու անդամները, իսկ ընդդիմությունը Վանաձորում ունի 18 մանդատ 33-ից, այսինքն մեծամասնություն է կազմում, կարող են անվստահություն հայտնել նորընտիր քաղաքապետին, այդ քվեարկությունն էլ տեղի կունենա բաց ձևաչափով և բոլորը կտեսնեն այդ 4 «հերոսներին», որոնք պայմանավորվածության են եկել իշխանությունների հետ: Դե իսկ եթե այդ երեք ուժերից մեկը հրաժարվի անվստահություն հայտնել ու փոխել քաղաքապետին, կհասկանանք, որ դա եղել է այդ ընդդիմադիր ուժի քաղաքական որոշումը, հանրությունն էլ կիամանա, թե այս ընտրություններին ով է լինելու ՀՀԿ-ի կցորդը, ինչը մյուս երկու ուժին լրացուցիչ ձայներ կապահովի:
Հ.գ. Այս դեպքը ցույց է տալիս, թե ինչքան անվստահ է իրեն զգում ՀՀԿ-ն...նրանք դիմեցին այս խայտառակ խարդախությանը, որ նույնիսկ այս մեկ քաղաքը՝ Վանաձորը չվերադարձնեն ժողովրդին: Իրենք գիտեն, որ դրանից հետո դոմինոյի սկզբունքով իրենց կառուցած արատավոր համակարգը կփլուզվի: Եվ սա գիտակցելով, հասարակությունը պետք է էլ ավելի ուժեղացնի ճնշումը իշխանությունների և ընդդիմության վրա, պահանջելով արդարություն: