2016-10-25 19:06:00
Այսօր խորհրդարանում լրագրողները ԱԺ փոխխոսնակ Էդուարդ Շարմազանովից հետաքրքրվեցին՝ ինչպե՞ս է վերջինս վերաբերվում այն հանգամանքին, որ իր կուսակից Սամվել Ալեքսանյանին Նիկոլ Փաշինյանն անուղղակիորեն մեղադրեց ռուսաստանաբնակ հայի` «Ձկնկուլ»-ի սպանության մեջ: ԱԺ փոխխոսնակը նկատեց, որ ինքը չէ, որ պետք է գնահատական տա:
«Կա համապատասխան մարմին, որն էլ հարկ եղած դեպքում պետք է զբաղվի այդ հարցով: Ես չէ, կամ մեր կուսակցությունը չէ, որ պետք է համապատասխան հայտարարություններով հանդես գանք: Եվ, առհասարակ, պատգամավորներին խորհուրդ կտայի այս ամբիոնից ըստ էության ու կոնկրետ հարցերի մասին խոսել: Սա շոուներ սարքելու տեղ չի»,- նկատեց Շարմազանովը:
Բայց չէ որ Սամվել Ալեքսանյանը ձեր կուսակիցն է և փաստորեն ձեր գործընկերոջ մասին է խոսքը: Այս դեպքում ի՞նչ կասեք. հետաքրքրվեցին լրագրողները: «Նորից եմ կրկնում, մենք չէ, որ պետք է գնահատական տանք, քննություն կլինի, ամեն բան կպարզվի»,- ընդգծեց Շարմազանովը:
Լրագրողները Շարմազանովին հարց ուղղեցին նաև Գագիկ Ծառուկյանի հնարավոր վերադարձի մասին: «Ես Ծառուկյանը չեմ, և ինձ չէ, որ պետք է ուղղեք ձեր հարցերը»,-շտապեց արձագանքել Շարմազանովը: Նրան երբ հիշեցրինք մի խումբ մարդկանց հավաքի մասին Ծառուկյանի տան մոտ և հարց ուղղեցին, թե արդյո՞ք սա չի խոսում Ծառուկյանի հնարավոր վերադարձի մասին, փոխխոսնակը նշեց, որ ժամանակից առաջ ընկնել չի շտապում: «Այս պահին նա քաղաքականության մեջ չէ, կվերադառնա, բոլորդ կիմանաք»:
Բայց կարծես թե փոխվել է ձեր վերաբերմունքը ԲՀԿ նախկին առաջնորդի ու հիմնադրի նկատմամբ. դիտարկեցին հավաքվածները. «Սիրելի լրագրողներ, շտապում եմ ևս մեկ անգամ կրկնել հույն փիլիսոփա Հերակլիտեսի խոսքերը՝ ամեն ինչ փոխվում է, ամեն ինչ հոսում է: Մենք խոսել ենք երևույթների, այլ ոչ թե անձերի մասին»,- պատասխանեց Էդուարդ Շարմազանովը:
Սևակ Վարդումյան
Այս նյութը դիտել են - 975 անգամ