Արա Աբրահամյանը սկսել է նախընտրական քարոզչությունը
2016-11-02 15:04:00
Ռուսաստանի հայերի միության նախագահ, Համաշխարհային հայկական կոնգրեսի նախագահ Արա Աբրահամյանը ձեռք չի քաշում 2017թ․ՀՀ ԱԺ ընտրություններին մասնակցելու գաղափարից: 
Բայց բնույթով զգուշավոր ու գաղտնապահ լինելով՝ նույնիսկ հիմա նա այդ մասին խոսում է այնպես, կարծես դեռ վերջնական որոշում չի կայացվել ու ինքն ինչ-որ կարևոր բանի է սպասում:
Դեռ ամիսներ առաջ էր Աբրահամյանն ասել, թե իր վերջնական խոսքը կասի աշնանը: Հիմա նոյեմբերն է, օրացուցային աշունը չի ավարտվել, և նա կարող է կառչել դրանից, պաուզան ձգել մինչև վերջին վայրկյանը, ինչպես անում են դերասանները:
Իսկ թե ինչ պիտի նրան տան մի քանի շաբաթները, սա ի սկզբանե հայտնի է՝ ոչինչ: Այդ պատճառով էլ իբրև թե դանդաղելով նա շտապում է ու արդեն իսկ խոսում է ցավոտ թեմայի մասին։
«Բազմիցս նշել եմ, որ ընտրություններին և քաղաքական իշխանության մասնակցության միջոցով Հայաստանին օգնելու իմ այս որոշումը պայմանավորված չէ որևէ բարձր պաշտոն կամ կոչում ձեռք բերելու շարժառիթով, ես դրա կարիքը պարզապես չունեմ: Իմ բոլոր քայլերն ուղղված են Հայաստանի շարքային քաղաքացիների խնդիրների բարձրացմանն ու դրանց լուծմանը»,- հայտարարում է Աբրահամյանը՝ մի նախադասության մեջ մի քանի անգամ հակասելով ինքն իրեն:
Եթե կարիքը չկա, ինչո՞ւ ես գնում ընտրության: Եթե օգնել ես ուզում, ինչո՞ւ չես օգնում առանց մանդատի:
Եթե անշահախնդիր ես, ինչո՞ւ ես այս մասին պատմում մարդկանց: Եվ ի՞նչ իմաստ կա արտասանելու այնպիսի մի դեմագոգ միտք, ինչպիսին սա է. «Կեղծ համեստություն չանեմ՝ միշտ գործել եմ Հայաստանի և նրա հասարակության համար օգտակար լինելու անհրաժեշտությունից դրդված»:
Կեղծ է ոչ միայն համեստությունը: Կեղծ է նաև այն ինքնագոհ հավաստիացումը, թե, իբր, Հայաստանի քաղաքացիներն ուզում են հավատալ, որ Արա Աբրահամյանը չի ստեղծի հուսախաբության հերթական առիթ և կփորձի արդարացնել իրենց համեստ հույսերը` կյանքը դեպի ավելի լավը փոխելու համար:
Հայաստանի քաղաքացիներն անհեթեթ բաներին վաղուց չեն հավատում:
Իսկ Արա Աբրահամյանն էլ խոր աշնանը սպասելու կարիք չունի: Նա արդեն ուսումնասիրում է ընտրազանգվածը, երկրի քաղաքական պատկերը, կառավարական փոփոխությունները և ընդդիմադիր ուժերը:
 Մյուս ուժերն Աբրահամյանին ուսումնասիրելու անհրաժեշտություն չեն տեսնում: Վաղուց են ծանոթ:
shame.am
Այս նյութը դիտել են - 4828 անգամ