«ՀՀ քաղաքացին չի կարող վստահել ոստիկանությանը, որը քաղաքացիների հետ շփվելիս հայհոյում է և ապօրինի գործողություններ իրականացնում»,- «Առաջին լրատվական»-ի հետ զրույցում նշեց իրավապաշտպան Ժաննա Ալեքսանյանը:
Ինչպես ավելի վաղ տեղեկացրել էինք, Human Rights Watch-ը հանդես է եկել հայտարարությամբ, որով պահանջում է դատապարտել Գևորգ Սաֆարյանի ձերբակալությունը և ազատ արձակել նրան:
Իրավապաշտպան Ժաննա Ալեքսանյանի խոսքով՝ վերջին մեկ տարվա ընթացքում միջազգային կառույցները բազմաթիվ հայտարարություններ են արել ոստիկանության բռնարարքների վերաբերյալ. ոստիկանությունը հայտնվել է ճգնաժամում: Իշխանությունները լրջորեն պետք է մտածեն, թե ինչու է ոստիկանությունը հոշոտում ՀՀ քաղաքացիներին, ովքեր փորձում են իրենց իրավունքներն իրացնել:
«Պարզ էր, որ Գևորգ Սաֆարյանը անմեղ էր, և ոստիկանների գործողություններն ապօրինի էին: Վստահ եմ, որ նրան ազատ են արձակելու, ոչ մի հիմք չունեն նրան կալանքի տակ պահելու: Դա ուղղակի ոստիկանապետի ցանկությունն է: Հայաստանի հեղինակությունը զրոյից իջել է արդեն: Եվ որևէ մեկը չի մտածում, թե միջազգային կազմակերպություններն ինչքան կարող են հայտարարություններով հանդես գալ»,- նշեց իրավապաշտպանը և հավելեց, որ շատ լավ կլինի, որ ՀՀ քաղաքացիները սովորեն դատի տալ ապօրինի ոստիկանական արարքների դեպքում, իսկ միջազգային կառույցները պետք է մտածեն, թե ոստիկանության հետ համագործակցությունն ինչ է տալիս իրականության մեջ:
Մանրամասները՝ տեսանյութում:
