Նախագահի աշխատակազմի նախկին ներկայացուցիչ Վիկտոր Դալլաքյանն այսօր՝ դեկտեմբերի 19-ին հրավիրված ասուլիսում մանրամասնել է «Երրորդ Հանրապետություն» կուսակցության ծրագրերն ու նպատակները: Վերջինս գտնում է, որ 2017 թվականի խորհրդարանական ընտրությունները շանս են Հայաստանում համաժողովրդական կոնսոլիդացիայի և տարբեր քաղաքական ուժերի համախմբման արդյունքում հասենլու խաղաղ իշխանափոխության:
«Ես ընդգծում եմ, որ մենք Հայաստանում պետք է իրականացնել դիտորդական համապատասխան առաքելություն: Ես կիսում եմ հանրահայտ գործիչներ Սերժ Թանկյանի, Ատոմ Էգոյանի և մյուս հայտնի գործիչների խոսքը այն նախաձեռնության մասին է, ըստ որի Հայաստանում պետք է իրականացվի միջազգային դիտորդական առաքելության»,- նշեց Դալլաքյանը: Սակայն վերջինս ընդգծեց նաև, որ ըստ Ընտրական օրենսգրքի, միջազգային դիտորդական առաքելության իրականացման իրավունք հնարավոր է ստանալ միայն համապատասխան հրավերի դեպքում, ինչը կարող են անել միայն իշխանության ներկայացուցիչները: Այս երևույթը Դալլաքյանը որպես աբսուրդ որակեց:
«Բոլորի համար ակնհայտ է, որ այն իշխանությունները, որոնք հաղթել են կեղծիքի շնորհիվ, դրանց ձեռնտու չէ նման հրավերներ իրականացնելը: Հետևաբար պետք է փոխել ընտրական օրենսգրքի այս նորմը, և ինչպես եղել է 98 թվականի Ընտրական օրենսգրքում, որի հեղինակը ես եմ, դիտորդական առաքելությունը պետք է դառնա կամավոր»:
Դալլաքյանը պատրաստ է սփյուռքի դիտորդական խմբի համար մշակել որոշակի մեխանիզմ, որը նրանց հնարավորություն կտա Հայաստանում իրականացնել միջազգային բնույթի դիտորդական առաքելություն:
««Երրորդ Հանրապետություն» կուսակցության ծրագրի մեջ ամրագրված է այն, որ սփյուռքահայությունը պետք է մասնակցի ՀՀ քաղաքական կյանքին: Եվ այդ մասնակցության վերաբերյալ կուսակցության ծրագրում ամրագրված է որոշակի մեխանիզմ. այն է ՀՀ-ում անցում կատարել երկպալատ խորհրդարանական համակարգի, որի վերին պալատը կլինի ներկայացուցչական մարմին և կներկայացնի ամբողջ սփյուռքահայությունը, իսկ ստորին պալատը կլինի օրենսդիր մարմինը»,-ասաց Վ. Դալլաքյանը:
«Երրորդ Հանրապետություն» կուսակցության փոխնախագահ Վիկտոր Դալլաքյանը համոզված է, որ այս ճանապարհով միայն հնարավոր կլինի համախմբել սփյուռքահայ մեր եղբայրների և քույրերի քաղաքական և ինտելեկտուալ ներուժը և օգտագործել այն հանուն Հայաստանի Հանրապետության: