ՀՀ նախկին վարչապետ Հովիկ Աբրահամյանի այսօր կատարած ֆեյսբուքյան գրառումից հետո տարբեր կալիբրի ՀՀԿ-ականները սկսեցին նրան քննադատող հայտարարություններ անել: Անհատների հայտարարություններից զատ հետաքրքիր զուգադիպությամբ «Պանարմենիա» մեդիա գրուպում ներառված «ArmNews» հեռուստաընկերությունը ժամը 18:00-ի սահմաններում եթեր հեռարձակեց «Պույ-պույ մկնիկը» մուլտֆիլմը, որտեղ մկնիկը հեշտությամբ հայտնվում է կոկոսի մեջ եւ սկսում է ագահորեն ուտել ներսի պարունակությունը: Գիրանալով մկնիկը չի կարողանում դուրս գալ կոկոսի միջից եւ մղձավանջներ է տեսնում՝ նույնիսկ իր հուղարկավորությունը:
Մուլտֆիլմն ավարտվում է նրանով, որ պատահաբար մեկ այլ կոկոս է պոկվում ծառից եւ ընկնելով այն կոկոսի վրա, որտեղ մուկն է եւ կոտրում է այն: Պույ-պույ մկնիկը հետագայում լինելով ազատության մեջ զգում է, որ շատ է գիրացել եւ չի կարողանում նույնիսկ իր բույնը մտնել, սկսում է մարզվել, նիհարել եւ վերադառնում է նախկին կազմվածքին:
Նշենք, որ «Պանարմենիա» մեդիա գրուպը պատկանում է Սերժ Սարգսյանի փեսային՝ Վատիկանում ՀՀ դեսպան Միքայել Մինասյանին:
Հովիկ Աբրահամյանն այսօր հակադարձել էր Սերժ Սարգսյանի՝ ՀՀԿ խորհրդի նիստում արված հայտարարությանը: Սերժ Սարգսյանը համեմատություն էր կատարել ՀՀԿ-ն լքելու գործընթացը մայր գետից առանձնացող առվակների հետ, որոնք Սարգսյանի համոզմամբ, հետագայում չորանում են: Հովիկ Աբրահամյանն էլ իր հերթին շարունակեց այսօր համեմատությունը: «Չմոռանանք նաեւ, որ մայր գետերը ոչ այլ ինչ են, քան ինքնամոռաց առվակների միավորում: Բայց ինչ-որ պահից գետ լցվող տեխնոլոգիական գործարանի խառնուրդային ջրերը կմխտռեն ողջ մայր հունը, անպիտան կդառնա ամբողջը: Միգուցե մինչ այդ պոկված՝ դեռ սեփական հողի հոտը կրող առվակները, մինչև ոչնչանալը, հասցնե՞ն գոնե մեկ-երկու բնակավայրի կյանք պարգևել»,- ֆեյսբուքյան իր էջում գրել էր Հովիկ Աբրահամյանը: