Այս օրերին մի նոր երգի տեսահոլովակ ծնվեց մեր դպրոցի անցած ուստարվա շրջանավարտ Սերգեյ Զաքարյանի կատարմամբ: Այդ մասին չգիտեի, բայց սովորության համաձայն` այս անգամ էլ նա ուղարկեց ինձ` մանկավարժիս կարծիքն իմանալու համար: Մտորումների մեջ ընկա` տեսնելով զինվորական համազգեստով դեպի հայրենի դիրքերը ծառայության մեկնող զինվորին երգելիս: Նրա ձեռքին երաժշտական գործիք կար, որի դյութիչ մեղեդու տակ խրոխտ հնչում էր այդ հրաշալի երգը:
Շուտով ես նրան հրավիրում եմ դպրոց: Պարզվում է` նա հունվարի 23-ին մեկնում է զինվորական պարտադիր ծառայության, նոր տեսահոլովակի ծննդյան մտահղացումն էլ իրենն է: Հոգում շաղախած մտորումները պիտի երգ դառնային ծառայության մեկնելուց առաջ: Նրան ուղղված իմ հարցերում ես տեսնում եմ մեր դպրոցի շրջանավարտին` «Վերջին զանգի» ժամանակ: Ապրիլյան զոհերին նվիրված նրա «Կա՛նգ առ, պատերա՛զմ» երգի նոր տեսահոլովակը, որ թնդում էր ամենուր, այդ օրն իր շուրջն էր համախմբել տարբեր կրթօջախներ տեղափոխված մեր դպրոցի շրջանավարտներին: Նրա երգով և բոլորիս արցունքներով սկսվեց ու վերջացավ «Վերջին զանգի» միջոցառումը:
Դպրոցն ավարտած և երգելու տաղանդով օժտված Սերգեյ Զաքարյանի համար Մարտակերտի մշակույթի տան դռները բաց էին, և շուտով նա աշխատանքի ընդունվեց: Սեպտեմբերի 24-ին ես նրա հրավերով մասնակցում էի իր մենահամերգին, այնուհետև նրան հեռվից հեռու տեսնում էի դիրքերում, որ երբեմն ինքն էլ իր ընկերների հետ այցի էր գնում զինվորներին, ոգևորում նրանց իր սքանչելի երգերի կատարումով:
Նա գոհունակություն ունի հայտնելու մարդկանց, ովքեր նպաստել են այս երաժշտական տեսահոլովակի ստեղծմանը: Երգի համակարգողն է Էդգար Ալեքսանյանը, իրենց ներդրումն ունեն այդտեղ մեր հայրենակից ռեփերներ Սպարտակ Հովսեփյանը և Արսեն Շիրինյանը: Նկարահանումը կատարվել է Էրիկ Պողոսյանի կողմից մեզանից ոչ հեռու գտնվող Տիգրանակերտի բարձունքի Վանքասարի եկեղեցու մոտ: Մարտակերտի շրջանային արհմիության նախագահ Մհեր Մանգասարյանի հովանավորությամբ է այն ի կատար ածվել, ձայնագրվել է Ստեփանակերտի «Անի» ստուդիայում:
«Մարտում», այսպես է կոչվում այս նոր նկարահանված երգի տեսահոլովակի վերնագիրը, որը մի պահ ցնցել էր ինձ: Ես ուզում եմ նրան և հայրենիքին զինվորագրված բոլոր տղաներին տեսնել խաղաղ օրերում երգի հնչյունների տակ. դա բոլորիս ցանկությունն է: Եվ իմ հարցին, թե ինչպես է տրամադրված հայրենիքի ապագա զինվորը, նա մեղմ ու զմայլելի մի ժպիտ է խաղացնում դեմքին ու պատրաստակամ կեցվածքով իր մարտական տրամադրությունն է արտահայտում:
Շնորհավորում եմ Մարտակերտում այս հիանալի հայրենասիրական նոր տեսահոլովակի ծնունդը և բարի ճանապարհ մաղթում երգիչ Սերգեյ Զաքարյանին ու բոլոր այն տղաներին, ովքեր մեկնում են զինվորական ծառայության: Թող խաղաղ լինի երկինքը, անփորձանք` սահմանը պահող զինվորների կյանքը: Նատաշա Պողոսյան