USArmenianews.com
Լրատվական կայք՝ Լոս Անջելեսից
Ուրբաթ, 29 2024թ.
Լոս Անջելես
: :
Երևան
: :
Գլխավոր|Քաղաքականություն|Պաշտոնական լրահոս|Հասարակություն|Սփյուռք|Մամուլի տեսություն|Մանկավարժի անկյուն|ՀՀ Ոստիկանական Համակարգի Իրական Դեմքը |Սոցցանց|Հարցազրույց|Տեսանյութ|Շոուբիզնես|Մշակույթ|Ուտելիք-Մուտելիք|Սպորտ|Առողջապահություն|Ժամանց|Հաճելի Երաժշտություն|am|am|am
Facebook twitter Youtube
Search
am en
Արխիվ
Օրվա Լուսանկար
ՀՀ վարչապետ Կարեն Կարապետյանի ամանորյա ուղերձը
2016-12-31 02:17:00
Տպել Տպել

ՀՀ վարչապետ Կարեն Կարապետյանի ամանորյա ուղերձը։

«Սիրելի հայրենակիցնե՛ր.

Այսօր այնպես է ստացվել, որ ես լինելով ձեզանից մեկը՝ հնարավորություն եւ պատիվ ունեմ շնորհավորելու ձեր Նոր տարին եւ Սուրբ ծնունդը:

Սրտա՛նց շնորհավորում եւ ցանկանում եմ, որ յուրաքանչյուրիդ ընտանիքում լինի տաք, ջերմ, լուսավոր ու սիրով լի:

Այս օրերին ձեր ընտանիքի անդամների, բարեկամների, ընկերների հետ հնարավորություն կունենաք միմյանց բազմաթիվ լավ խոսքեր, բարեմաղթանքներ ասելու, ձեր երեխաներին եւ թոռնիկներին գրկելու, ծնողներին մեծարելու: Ես հույս ունեմ, որ միմյանց ասված բոլոր ցանկությունները ա՛նպայման կիրականանան:

Ցանկանում եմ նաեւ , որ նոր տարվա տոներից հետո առօրյա կյանք վերադառնաք լա՛վատեսությամբ տրամադրված, աշխատանքային նո՛ր եռանդով, եւ մասնակից դառնաք մեր երկրի ապագայի կառուցմանը, այն ապագայի, որ մենք բոլորս երազում ենք:

Խոստանում եմ ձեզ, որ կառավարությունը, իմ թիմակիցները օր ու գիշեր անմնացորդ աշխատելու են, որպեսզի մաքսիմալ իրագործվեն բոլոր այն նախաձեռնություններն ու ծրագրերը, որոնք անհրաժեշտ են մեր ժողովրդին :

Մի բան հստակ գիտեմ, որ այդ ամենը մե՛նք անելու ենք, եւ դրա համար անհրաժեշտ է յուրաքանչյուրիս ցանկությունը, կամքը եւ լավատեսությունը:

Սի՛րելի ժողովուրդ,

Չի լինելու մի պահ, որ դժվարություններ ու պրոբլեմներ ընդհանրապես չլինեն: Բոլոր երկրների ու ազգերի մոտ դրանք անխուսափելի են: Նշանակու՞մ է դա, որ այդ դժվարություններից պետք է խեղճանանք, պետք է նեղսրտենք: Իհարկե՝ ոչ: Հա՛կառակը , պետք է դեմ առ դեմ կանգնենք, լուծենք ու գնանք առաջ:

Առջեւում մեզ ծանր աշխատանք է սպասվում: Խնդրում եմ ձեզ չկասկածե՛լ, որ մեր ձգտումների մեջ մենք անկեղծ ենք, եւ գնալու ենք մինչեւ վերջ: Մեր ժողովուրդը միշտ արդարամիտ է: Մենք էլ մեր հերթին պատրաստ ենք լսել յուրաքանչյուր քննադատություն եւ խորհուրդ: Պատրաստ ենք ձեզ հետ միասին ամեն օր մի քայլ անելով, մի քար դնելով հաստատակամ շարժվենք առաջ:

Իմ ամենամեծ բարեմաղթանքը եւ ցանկությունն է, որ նոր տարուց սկսած ապագային նայենք ավելի վստահ եւ համարձակ:

Տարեմուտի այս օրը ցանկանում եմ բոլորի օջախներին սեր եւ ջերմություն, իսկ մեր երկրին՝ խաղաղություն եւ բարեկեցություն:

Շնորհավոր Նոր տարի եւ Սուրբ ծնունդ, բոլորիդ՝ լավ տրամադրություն: 

Այս նյութը դիտել են - 1933 անգամ
Թողնել մեկնաբանություն
Բոլորը ›››
Facebook