Ազգային ժողովի պատգամավոր, արտաքին գործերի նախկին նախարար Վարդան Օսկանյանը վերջապես խոստովանեց՝ նա նոր կուսակցություն է հիմնում: «Կուսակցություն ստեղծելու հետ կապված աշխատանքները բավական առաջ են գնացել, այս պահին ուղղակի դեռ ես պատրաստ չեմ հայտարարելու, որ ստեղծվում է կուսակցություն, բայց կլինի»,- ասել է նա՝ անիմաստ դարձնելով անցած ամիսների գաղտնապահությունը:

Թե որ պահին վրա կհասնի հայտարարության ժամը, դա արդեն այնքան էլ էական չէ, սակայն ներկա պահին առավել հետաքրքրական է, թե ինչպիսին են Օսկանյան- Քոչարյան առնչությունները այդ կուսակցության ֆոնին: Եվ հենց այստեղ էլ նախկին նախարարը դիմում է հին մեթոդին՝ հերքելով հերքում է նման կապի հնարավորությունը: «Քոչարյանը այս ստեղծվելիք կուսակցության հետ կապ չունի։ Գիտեմ, որ դա իսկապես շահարկվում է, հստակ ինչ-որ նպատակ է հետապնդվում դրանից», - ասել է նա՝ հավելելով, որ այսօր էլ կապը նախկին նախագահի հետ պահում է, հանդիպում է, բայց համատեղ քաղաքական ծրագիր երբեք չեն մշակել։

Շատ դժվար, անչափ դժվար է հավատ ընծայել Վարդան Օսկանյանի հավաստիացումների անկեղծությանը: Հին դիվանագետն այս դեպքում ջանում է բացառել ակնհայտը, մինչդեռ նրա հերքումների հիմքում լուրջ դրդապատճառներ կան: Եվ հենց ինքն էլ հաջորդ պահին քողազերծում է այդ շարժառիթները՝ խոսելով իր կուսակցությանը Ռոբերտ Քոչարյանի հնարավոր անդամակցության մասին: Հարցին՝ եթե Քոչարյանը որոշի անդամակցել կուսակցությանը, կընդունե՞ն նրան, նախկին նախարարը պատասխանում է. «Դա ժամանակի խնդիր է... Ինքը բաց կուսակցություն պետք է լինի։ Ես Քոչարյանի հետ նորմալ հարաբերություններ ունեմ, ... ես խնդիր չունեմ։ Ժողովրդի կողմից ինչ-որ ընկալում կա էդ բոլորին։ Ուղղակի ես հիմա արձանագրում եմ այն փաստը, որ սա Քոչարյանի հետ կապ չունի՝ այն կուսակցությունը, որ ստեղծվելու է»։

Այսպիսի պատասխանից հետո լիովին հասկանալի են դառնում Օսկանյանի մտավախությունները: Ներկա պահին նորաստեղծ կուսակցությանը խիստ անհրաժեշտ է, որպեսզի Քոչարյանի անունը չկապվի դրա հետ, քանի որ նույնիսկ Օսկանյանն է գիտակցում, որ դա հավասարազոր կլինի լիակատար տապալման: Հասարակության համար Քոչարյանի անունը նույնն է, թե ի վերուստ տրված անեծքը: Իսկ Վարդան Օսկանյանը հիմա անիծյալների թվում լինել չի ցանկանում, թեև Քոչարյանի նզովքը շատ վաղուց է հետապնդում նրան և դրանից փախչելն այլևս անհնար է:

shame.am