«2008–ից հետո հայկական կողմը Ղարաբաղի հարցում 3 կետով շատ լուրջ զիջումների է գնացել՝ 1. Լաչինի շրջանը դարձել է Լաչինի միջանցք կամ կածան և հիմա դրա շուրջ են կռիվ տալիս, 2. համաձայնել են ադրբեջանցի տեղահանվածների վերադարձին Շուշի և Լաչին, 3. ԼՂՀ կարգավիճակը վերջնական հանրաքվեով կամ պլեբսիցիտով որոշելու հարցը թողնված է անորոշ ապագային ու դրա փոխարեն ուզում են միջանկյալ կարգավիճակի հարց լուծել», - սա մեջբերում է գեներալի հարցազրույցից, որն ապացուցում է ասվածի ճշմարտացիությունը:

Այսօր իշխանությունները, փորձելով գցել իրենց վրայից ստեղծված խայտառակ իրավիճակի պատասխանատվությունը, հայտարարում են, թե գործում են հայտնի «մադրիդյան սկզբունքների» շրջանակներում, որոնք ընդունվել էին 2008-ից առաջ:

Սա ևս մեկ անգամ ապացուցում է այս մարդկանց անհեռատեսությունն ու քաղաքական անգրագիտությունը: Մադրիդյան սկզբունքներն ընդունվել էին որպես բանակցային գործընթացի առարկա, որոնց յուրաքանչյուր կետի հետ պետք էր վիճել, վերաձևակերպել և հասնել ցանկալի արդյունքի: Դրանք նույնքան ձեռնտու չէին Ադրբեջան, որքան նաև Հայաստանին:

Սակայն Ալիևը կարողացավ՝ ի տարբերություն սերժ Սարգսյանի, մաքսիմալ արդյունք քաղել այդ փաստաթղթից՝ ժամանակ ձգելով հասցրեց և դեռ շարունակում է զինվել, Սերժ Սարգսյանից էլ կորզեց հնարավոր բոլոր զիջումները՝ հիմա էլ անհնարինն է պահանջում: Եվ ի զարմանս բոլորիս, Սերժ Սարգսյանը դա էլ է պատրաստ տալ Ալիևին:

Անմեղ զոհերի գնով իշխանության եկած Սերժ Սարգսյանը այս 8 տարիների ընթացքում բացարձակապես ոչինչ չկարողացավ անել, որ Հայաստանը ուժեղանա, կարողանա վստահորեն իր պահանջները ներկայացնի հակառակորդին և միջազգային հանրությանը: Դեռ ավելին՝ այդ պահանջներն էլ չկարողացավ հստակ ձևակերպել՝ Հայաստանը վերածելով միջազգային հարաբերությունների օբյեկտի՝ սակարկության առարկայի: Նա երկիրը հասցրեց ծայրահեղ աղքատության և հեղինակազրկեց մեր պետությունը:

Սա օրհասական՝ կյանքի ու մահվան խնդիր է, որի մասին բոլորս գիտենք, բայց դեռևս ոչ բոլորս ենք գիտակցում:

Այն ինչ ժամանակը սպառվում է, եթե արդեն չի սպառվել: Սերժ Սարգսյանի իշխանությունը իրական սպառնալիք է հայկական երկու պետությունների, հայ ժողովրդի համար և մենք պետք է արթնանանք...Հակառակ դեպքում մեզ կարթնացնեն ադրբեջանական տանկերն ու հրետանին: Սա պետք է կանխել: Սերժ Սարգսյանը ոչ միայն չի կարողանում դա անել, այլ նաև խանգարում է այն մարդկանց, ովքեր կարող են: Սրան պետք է օր առաջ վերջ դրվի...վաղն արդեն ուշ է լինելու:

Հրանտ Ենոքյանի ՖԲ էջից