Հարգելի Պարոն Փաշինյան

ԱԺ-ում 15 նոյեմբեր 2016 թ Ձեր ելույթից մեջբերում եմ՝ «Առանց վենդետաների, առանց գիլոտինների, առանց կախաղանների, առանց վրեժխնդրության, պետք չէ որևէ մեկին բոմժ սարքել, բայց պետք չէ նաև թողնել, որ Հայաստանի Հանրապետությունը բոմժ
դառնա:Հայաստանից գողացվածը պետք է վերադարձվի և Հայաստանի թշնամիները պետք է ծնկի գան»: Մեջբերման ավարտը:
Հոյակապ է և անկրկնելի, սակայն առաջանում է հարց, որի պատասխանը ցանկալի է ստանալ Ձեզ հատուկ ուղիղ և ճշմարիտ դատողությամբ, առանց դիվանագիտական թեքումների:
Մեր երկիրը իրավական պետություն դարձնելու ճանապարհին հնարավո՞ր եք համարում օրենքի տառի կիրառման հետ զուգահեռ ընդունել նաև զգացմունքայնությունը:
Այսինքն,եթե իշխանության առաջին դեմքերից մեկը, թալանել է ժողովրդին, նրան մատնել աղքատության, թալանել է բանակի միջոցները, տնտեսության զարգացման համար նախատեսված ռեսուրսները, Հյուսիս Հարավ ճանապարհի մոտ մեկ միլիարդ գումարը մասամբ գողացել, մասամբ փոշիացրել է, այդ մարդուն ասենք թալանածդ 10 միլիարդի 5 միլիարդը վերցրու գնա՞,որովհետև մենք հումանիստ ենք ու քեզ բոմժի կարգավիճակում տեսնել չե՞նք ուզում:
Բա էլ որտե՞ղ մնաց «Պլատոնը իմ ընկերն է, բայց ճշմարտությունը ավելի թանկ է» սկզբունքը:
Իմ համոզմունքով, անկախ դեմքից դիրքից, զբաղեցրած պաշտոնից, անկախ ապօրինի հարստացման քրեականացման մասին օրենքի նախագծի հետադարձ ուժ չունենալու հենց մեր իշխանությունների համար նախատեսված շինծու սկզբունքից, յուրաքանչյուր հանցանք պատժվելու է օրենքի տառին համապատասխան:
Կատարված ֆինանսական և այլ տիպի հանցագործոթյունները իրենց մասշտաբով սպառնալիք են Հայաստանի ազգային անվտանգությանը, և դրանք կատարած անձինք պետք է խստագույնս պատժվեն, օրենքով նախատեսված իրավական նորմերով:
Մեր դեպքում օրենքի հետադարձ ուժ չունենալու կիրառումը,պատժամիջոցը և պատժաչափը մեղմացնելու նպատակով կիրառելը անթույլատրելի է, քանզի դա կնշանակի, որ կոռուպցիայի դեմ պայքարելու համար դրսից ստացվող միլիոնավոր դոլարները օգտագործվում են, նույն այդ կոռուպցիան խրախուսելու նպատակով:
Շնորհակալություն հնարավոր պատասխանի համար:

Սպարտակ Հակոբյան