Այս դատավարությունը եւս ընթացավ հայտնի սցենարով՝ ընտրակեղծարարն ընդունեց մեղքը եւ խնդրեց արագացված դատաքննություն կիրառել, արդյունքում՝ ստացավ ամենամեղմ պատիժը։ «ՉԻ» տեղեկություններով, Հասմիկ Հովհաննիսյանի հանցագործությունը բացահայտվել է «Թրանսփարենսի ինտերնեյշնլ» հակակոռուպցիոն կազմակերպության դիտորդի կողմից, երբ վերջինս նկատել էր, թե Հասմիկ  Հովհաննիսյանն ինչպես է ուրիշի փոխարեն ստորագրում եւ քվեարկում։

 

Սկզբում ոստիկանությունը հրաժարվել էր քրեական գործ հարուցելուց, բայց դիտորդի՝ ՀՀ գլխավոր դատախազություն ուղարկած բողոքից հետո գործը հարուցվել ու նախաքննության էր ուղարկվել Քննչական կոմիտե։ Բայց, ինչպես պնդում են «ՉԻ» լավատեղյակ աղբյուրները, 26-ամյա ՀՀԿ-ական ընտրակեղծարարը հանրաքվեի օրը փորձել է կեղծել նաեւ հանձնաժողովի ընդդիմադիր անդամներից մեկի ստորագրությունը, եւ այս ուղղությամբ եւս նախաքննական որոշ գործողություններ են իրականացվել։

 

Դատարանում ընտրակեղծարարը հայտարարեց, թե ինքը գործազուրկ է, իսկ ահա ըստ որոշ լուրերի, նա մինչեւ վերջերս աշխատել է Երեւանի Կենտրոնի թաղապետարանում՝ որպես գործավարուհի։