Նուբարաշենի խճուղում հայտնի լեզվաբանի ամուսնու՝ 58-ամյա Եղիշե Խաչատրյանի սպանության գործով երկու մեղադրյալների՝ Արարատ Նիկողոսյանի եւ Արտաշես Չիչոյանի  կալանքը վերահաստատվել է: Այս մասին այսօր հաղորդագրություն տարածեց ՀՀ հատուկ քննչական ծառայությունը: Վերջիններս չորս օր գտնվում էին հետախուզման մեջ: Վճռաբեկ դատարանի նախադեպային որոշման համաձայն՝ հետախուզման մեջ գտնվող անձին հայտնաբերելուց հետո նա պետք է անհապաղ (72 ժամվա ընթացքում) տարվի դատավորի մոտ, խափանման միջոցի հարցը նրա ներկայությամբ կրկին քննարկելու համար:

Եղիշե Խաչատրյանի սպանության գործով կա երեք մեղադրայլ՝ 26-ամայ Խաչիկ Կոսյանը նրա աներորդին՝ Արտաշես Չիչոյանը եւ Արարատ Նիկողոսյանը: Նրանց մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 7-րդ եւ 10-րդ կետերով (սպանություն՝ մի խումբ անձանց կողմից խուլիգանական դրդումներով): Այսօր մեր զրույցում Արարատ Նիկողոսյանի պաշտպան Վրեժ Խաչիկյանը նշեց, որ իր պաշտպանյալը շատ ընկճված է, որեւէ բառ չի արտասանում: Մեր հարցին, թե ընդունո՞ւմ է իրեն առաջադրված մեղադրանքը, պաշտպանը պատասխանեց. «Արարատ Նիկողոսյանը ոչ մի հարցի չի պատասխանում, միայն դատարանում կրկնել է իր անուն-ազգանունը, որից հետո հրաժարվել է բոլոր հարցերին պատասխանելուց: Ընկճված եւ մտածմունքերի մեջ ընկած է, նույնիսկ ինձ հետ չի խոսում եւ իմ հարցերին չի համապատասխանում: Պարզ է, որ նա մտածում է, թե ինչու այդ դեպքը տեղի ունեցավ: Նրա նկատմամբ երկու ամիս կալանք կիրառվեց եւ տեղափոխեցին «Նուբարաշեն» ՔԿՀ: Հիմա, թե նախաքննության հետագա ընթացքը ինչպես կլինի, չեմ կարող ասել»,-ասաց Խաչիկյանը:

Մեր ճշտող հարցին, այսինքն հրաժարվե՞լ է ցուցմունք տալուց, պաշտպանն ասաց, որ ոչ միայն հրաժարվել է, այլ ընդհանրապես չի խոսում: Մեր մյուս հարցին, թե բողոքարկելո՞ւ են կալանքի որոշումը, Վրեժ Խաչիկյանը նշեց, որ պետք է քննարկի իր պաշտպանյալի հետ: Սույն գործով մյուս մեղադրյալ Արտաշես Չիչոյանի պաշտպան Միհրան Պողոսյանը մեր զրույցում նույնպես նշեց, որ դեռ պարզ չէ կբողոքարկեն կալանքի որոշում, թե ոչ. «Այս պահին որեւէ դիրքորոշում չունենք 2 օրվա ընթացքում այդ հարcը կքննարկենք: Ես կարծուm եմ, որ կալանքի հիմքերը բացակայում են, այնուամենայնիվ քննարկումից հետո նոր կորոշենք»,-ասաց նա:

Հիշեցնենք, որ հայտնի լեզվաբանի ամուսինը սպանվել է հունիսի 4-ին՝ դաժան ծեծի հետեւանքով: Մի խումբ անձինք նրան մոր ներկայությամբ ծեծի են ենթարկել՝ բազմաթիվ հարվածներ հասցնելով նրա կենսական կարեւոր օրգանի՝ գլխի, ինչպես նաեւ՝ կրծքավանդակի եւ որովայնի շրջաններում:

hayeli.am