58-ամյա Եղիշե Խաչատրյանի (հայտնի լեզվաբան Փառանձեմ Մեյթիխանյանի ամուսնու) սպանության գործով կալանավորված Արարատ Նիկողոսյանի փաստաբան Վրեժ Խաչիկյանը պնդում է, որ նա դեպքից հետո փախուստի չի դիմել, նա չի իմացել, որ 58-ամյա տղամարդը ծեծկռտուքից հետո մահացել է եւ ինքը փնտրվում է ոստիկանության կողմից:
«Արարատ Նիկողոսյանը հենց իմացել է, որ մահացել է տվյալ անձնավորությունը՝ ինքնակամ եկել, ներկայացել է ոստիկանություն»,- NEWS.am-ի հետ զրույցում ասաց փաստաբանը:
Հարցին՝ արդյոք իր պաշտպանյալին մեկ շաբա՞թ էր պետք, որ կարողանար իմանալ, որ իրենց կողմից ծեծի ենթարկված տղամարդը հենց նույն օրը մահացել է եւ ինքն էլ հետախուզման մեջ է, այն դեպքում, երբ ամբողջ մամուլը հեղեղված էր այդ մասին նյութերով, փաստաբանը պատասխանեց՝ «Ինչքանով ես եմ տեղեկացված, դեպքից հետո գնացել են այդ տարածքից, հետո իմացել են, որ մահացել է՝ եկել ինքնակամ ներկայացել են: Օրենքով որոշում է կայացվել բերման ենթարկել նրան, քանի որ տանը չի եղել, հենց այդ պատճառով է նրա նկատմամբ հետախուզում հայտարարվել, հենց իմացել է՝ ներկայացել է»:
Փաստաբանը հստակ պատասխան չտվեց, թե որտեղ է գտնվել իր պաշտպանյալն այս մեկ շաբաթվա ընթացքում, նշելով, որ չգիտի, տեղեկացված էլ լիներ՝ իրավասու չէր լինի պատասխանել:
Վրեժ Խաչիկյանը նշեց, որ դեռ չի ցանկանում դիրքորոշում հայտնել իր պաշտպանյալին առաջադրված մեղադրանքի վերաբերյալ, քանի որ գործի նյութերին ամբողջությամբ չի հասցրել ծանոթանալ:
«Արարատ Նիկողոսյանն այս ընթացքում ոչ մի հարցի չի պատասխանել, ոչ մի բան չի խոսել, ընդամենն իր անունն ու ազգանունն է ասել: Պաշտպանյալիս հետ դատարանում ենք հանդիպել, հաջորդ շաբաթ եմ նրա հետ զրուցելու»,-ասաց նա:
Նույն գործով կալանավորված Արտաշես Չիչոյանի պաշտպան Միհրան Պողոսյանն էլ մեզ հետ զրույցում նշեց, որ տեսակցել է իր պաշտպանյալին, խոսել է նրա հետ, սակայն, հաշվի առնելով այն հանգամանքը, որ Արարատ Չիչոյանի նկատմամբ առաջադրված մեղադրանքի վերաբերյալ իրենք դեռ դիրքորոշում չեն հայտնել, հրաժարվում է մանրամասներ ներկայացնելուց:
Նշենք, սակայն, որ սպանվածի կինը՝ Փառանձեմ մեյթիխանյանը նշել է, որ իր սկեսուրը, որը ներկա է եղել միջադեպին, հայտնել է, որ իր որդուն ծեծողները հեռացել են միայն այն բանից հետո, երբ իմացել են, որ նա այլեւս չի շնչում:
Ավելի վաղ NEWS.am-ը հայտնել էր, որ 58-ամյա Եղիշե Խաչատրյանի սպանության գործով մեղադրյալներ 26-ամյա Արարատ Նիկողոսյանն ու 23-ամյա Արտաշես Չիչոյանը, որ հետախուզման մեջ էին, հունիսի 12-ի գիշերը ներկայացել էին ոստիկանություն:
Հիշեցնենք, որ հունիսի 4-ին, ժամը 23-ին, «Ֆորդ Տրանզիտ» մակնիշի ավտոմեքենայի վարորդ, 1958 թ. ծնված Եղիշե Խաչատրյանի եւ ճանապարհատրանսպորտային երթեւեկության կանոնները խախտած ավտոմեքենայի վարորդի եւ ուղեւորների միջեւ Նուբարաշենի խճուղու թիվ 1/5 հասցեի մոտ տեղի էր ունեցել վիճաբանություն, որի ընթացքում վերջինս Խաչատրյանը դաժան ծեծի էր ենթարկվել եւ ստացած մարմնական վնասվածքներից մահացել էր:
Գործով 3 մեղադրյալները՝ 26-ամյա Խաչիկ Կոսյանը, Արարատ Նիկողոսյանն ու 23-ամյա Արտաշես Չիչոյանը կալանավորված են:
Ի դեպ, 26-ամյա Խաչիկ Կոսյանը նաեւ մեկ այլ գործով է հայտնի: Մասնավորապես, 6 տարի առաջ, 2010 թվականի մայիսի 31-ի կեսգիշերին մոտ նա Երեւանի Մխիթար Հերացու փողոցում վրաերթի էր ենթարկել 18-20 տարեկան երկու աղջիկների եւ դիմել փախուստի: Աղջիկները մահացել են:

Նա դատապարտվել է 4 տարվա ազատազրկման, սակայն երեք տարի անց համաներումով ազատ է արձակվել:

news.am