Երեւանի Քանաքեռ-Զեյթուն համայնքում գտնվող թիվ 152 մանկապարտեզի տնօրինությունը սկսել է իր սաներից բավականին մեծ գումարներ պահանջել։ Հավանաբար մանկապարտեզի տնօրենը՝ տիկին Զիտտա Նազարյանը, որոշել է մանկապարտեզի սաների ծնողների հաշվին իր ամառային հանգիստն անցկացնել էկզոտիկ որեւէ երկրում։

«ՉԻ» տեղեկություններով` մանկապարտեզի տնօրենը՝ Նազարյանը, 10 հազարական դրամ է պահանջել երեխաների ծնողներից՝ բացատրելով, որ դրանից 6 հազար դրամով պետք է ավարտական հանդեսի շրջանակներում բեմադրված պարի հագուստ գնել, 4 հազարն էլ՝ վինետկայի գումար է։ Ընդ որում՝ տնօրենը կոնկրետ մատնացույց է արել պարի հագուստի ձեռքբերման տեղը։ Սա էլ մի կողմ, երբ ծնողները ասել են, թե հնարավորություն ունեն անվճար մեկ օրով վերցնելու պարի հանդերձանք, ըստ այդմ՝ պետք չէ լրացուցիչ ծախսեր անել, տնօրենը հրաժարվել է առաջարկից ու ավելի հեռուն գնացող հայտարարություններ է արել։ Մասնավորապես նա ասել է, թե ծնողների հաշվին ձեռքբերվող հանդերձանքը մնալու է մանկապարտեզին, որպեսզի հաջորդ սերունդներն էլ օգտագործեն դրանք։

Տնօրենի անհասկանալի պահվածքի վերաբերյալ ծնողները ահազանգել են  Քանաքեռ-Զեյթուն համայնքի թաղապետարան։ Հաջորդ օրը մանկապարտեզի տնօրենը մանկապարտեզ է հրավիրել երեխաների ծնողներին ու նրանցից ամեն մեկին ստորագրել է տվել նամակ, թե իբր մանկապարտեզի տնօրինությունը վերադարձրել է հավաքած գումարը։ Ծնողներն էլ ստորագրել են՝ կարծելով, թե դրանից հետո կստանան իրենց գումարները։ Բայց` ոչ։ Տնօրեն Զիտտա Նազարյանը ոչ միայն չի վերադարձրել գումարները, այլեւ հաջորդ օրը պարտավորեցրել է ծնողներին եւս 4 հազար դրամ վճարել՝ դաստիարակներին նվերներ գնելու պատրվակով։ Այսինքն՝ ամեն երեխայից տնօրենը որոշել է «պոկել» 14 հազար դրամ։

Մեր տեղեկություններով` «ռեկետի» թիրախ հանդիսացող տվյալ խումբը բաղկացած է 30 հոգուց։ Հավելենք նաեւ, որ ավարտական միջոցառումներ մանկապարտեզում ավանդաբար անցկացնում են բոլոր խմբերը։ Ուստի՝ մենք փորձեցինք պարզել, թե քանի խումբ եւ քանի երեխա կա այս մանկապարտեզում։ Համաձայն «ognirmankapartezid.am» կայքի՝ այս մանկապարտեզում խմբերի քանակը 4-ն է, իսկ երեխաների քանակը` 125։ Մանկապարտեզի աշխատակազմն էլ բաղկացած է 23 հոգուց։

Երեւանի քաղաքապետարանի Կրթության վարչության թեժ գիծն այս թեմայով ահազանգ չի ստացել։ Քաղաքապետարանից մեզ խոստացան ուսումնասիրել խնդիրն ու պարզաբանումներ ներկայացնել «ՉԻ»-ին։

 Գոհար Վեզիրյան