Ահա, թե ինչ է ասում մարդը, որին Հայաստանի հարկատուները վճարում են, որպեսզի նա Ռուսաստանում ներկայացնի Հայաստանի շահը, պաշտպանի Հայաստանի պետական արժանապատվությունը:

 Եթե քաղաքական անհեթեթությամբ բնորոշվող Վլադիմիր Ժիրինովսկին սեպտեմբերին կայանալիք խորհրդարանի ընտրությունից առաջ «թքած ունենար» Օլեգ Եսայան ֆիզիկական անձի վրա, ապա դրա անհեթեության, արտառոցոթյան, լրջության վերաբերյալ կարծիքներն իհարկե կլինեին Օլեգ Եսայանի զուտ կամ «սուգուբը» ներքին գործը, եւ Օլեգ Եսայանը լիովին իրավասու կլիներ անձամբ որոշել՝ «թքածը» Ռուսաստանի՞ վերաբերմունքն է, թե միայն Ժիրինովսկու:

 Բայց, Վլադիմիր Ժիրինովսկին օգտագործել է «թքած Հայաստանի վրա» արտահայտությունը, եւ Ժիրինովսկին Հայաստանի դեսպանատան դիմաց կանգնող անտուն եւ թափառական մեկը չէ, այլ ՌԴ Պետական Դումայի պատգամավոր, այսինքն ՌԴ պետական կնիք կրող մի մարդ: Եվ մի անձ, որը ամբողջ հայկական դահլիճներ էր «էքստազի» հասցնում՝ այդ թվում ծափահարություններ եւ գոհունակ ժպիտ կորզելով անեւ այդ դահլիճների առաջին շարքերում նստած Հայաստանի դեսպանից, երբ նրան հրավիրում էին զանազան հայկական տաշիր-տուշիներին եւ խոսեցնում Արարատից, Արեւմտյան Հայաստանից, Ղարաբաղը «մերն է»-ից եւ այլն:

 Համերգի կազմակերպիչներին Եսայանի խորհուրդների մասին պատմությունը լռում է, իսկ ահա ՌԴ ԱԳՆ-ին «մեր տեսակետները հայտնելու» մասին Եսայանը խոսում է անձամբ: « ՌԴ պետդումայի էկսցենտրիկ պատգամավորի ցինիկ արտահայտությունների մասին մեր տեսակետներն ենք հայտնել ՌԴ ԱԳՆ, որտեղից համապատասխան պարզաբանումներ ենք ստացել»:

 Հետաքրքիր է, ի՞նչ տեսակետ է հայտնել Եսայանը, եւ ամենակարեւորը՝ ինչո՞վ: Եվ հայտնել է անձնակա՞ն, թե՞ պաշտոնական տեսակետ: Որովհետեւ, եթե հայտնվում է պաշտոնական տեսակետ՝ ինչի համար Հայաստանի հարկատուները վճարում են Օլեգ Եսայանին, ապա վճարողները պետք է տեղեկանան նրա պաշտոնական գործունեության մասին, տեղեկանան, թե նա ինչպես պաշտպանում Հայաստանի շահը: Ըստ այդմ, ՌԴ ԱԳՆ «մեր տեսակետները» պետք է հայտնվեն հրապարակավ, որպեսզի քաղաքացիները տեղյակ լինեն, թե ի՞նչ տեսակետ է հայտնել Եսայանը:

 Ըստ այդմ, պետք է պարզ լինի, թե ինչ «համապատասխան պարզաբանում» է տվել ՌԴ ԱԳՆ-ն: Որովհետեւ, շատ հավանական է, որ այդ պարզաբանումը տվել է այդ ԱԳՆ հայտնի դեմքը՝ խոսնակ եւ պարուհի Մարիա Զախարովան: Իսկ նա կարող էր տալ ամենատարբեր բնույթի պարզաբանում, սկսած քաղաքականից, վերջացրած խորեոգրաֆիկով՝ հայ ժողովրդի սիրտը շահելու համար ասենք պարի հրավիրելով հարգարժան դեսպանին եւ հաճոյախոսելով, որ նրան ոչինչ չի խանգարում պարել հիանալի:

lragir.am